Verê ke dewleta tirke hêrîşê herêma Efrînî kerdbî, Efrîn Sûrîye de herêma tewr ewle bîye. Wexto ke kesêkî seba sucanê şerî herêma xo biterknayêne her tim waştêne ke vera xo bido Efrînî. Efrîn bi sîstemê rayberîya xosere ameyêne îdarekerdene û her kes eşkîyayêne bi reng û ziwanê tede bimano. 

La no sîstemo ke Efrîn de amebi roniştene ke hetê Rayberê Şarê Kurdî Abdullah Ocalanî ra amebi viraştene, goreyê menfeetê hêzanê mîyannetewîyan nêbî. Armencê destpêkê îşxalkerîya Efrînî zî xirakerdişê nê sîstemî bî.

20ê çeleyê 2018î de gamê destpêkî seba plananê nê hêzan ameyî eştene. A roje dewleta tirke bi teyarayanê şerî seranserê Efrînî bombardûman kerd. Hemverê nê hêrîşan de zî hetê şar û şerwananê Efrînî ra destana Xoverdayîşê Serdemî ameye munitene.

Şahîdanê ê wextî ANFyî rê behsê gamanê destpêkî kerdî. Endama Meclîsê Zagonsazî ya Kantonê Efrînî û Şehba Muşîre Menle Reşîde, têkildara babete wina vat: ‘‘20ê çeleyê 2018î de wexto ke dewleta tirke dest bi hêrîşanê îşxalî kerdî, sazgehê mîyannetewîyî bêveng mendî. Seba cayê xo yê cografîkî Efrîn qadêko stratejîk o. Seba menfeetî, destê hêzanê mîyannetewîyan zî tede est bî. Dewleta tirke bi hêrîşanê Efrînî waşt ke herêmanê bînan ê ke îşxal kerdî, înan biresna yewbînan. Bi no hewa zî çetayanê xo rê qadêkê hîna hîrayî awan bikera û bieşkîya birehetî têwbigêra. Armancê hêrîşanê dewleta tirke o bî ke projeya wayûbiratîya şaran a ke bi felsefeya Rayber Apoyî Efrîn de ameye awankerdene, aye xira bikera.

Şahîdanê ê prosesî ra  yew zî Cafer Cafoyî yo ke muxabîrîya ANHA kerdêne. Cafoyî zî vat: ''20ê çeleyê 2018î de saete 04.00 de ma karî ser de bîyê vengêk ame. A roje bi desan teyarayî Efrînî ser o gêrayêne û înan Efrîn dayêne bombayan ver. Ma wexto ke nê helî teqîb kerdêne dî ke şaro sivîl senî ame qetilkerdene. La xoverdayîşê 58 rojan bi belge û dosyayan nê hêriş û qirkerdişî dinya rê mojnayî. La her kes vera nê kerdişan bêveng mend.''