Merkezê Îrtîbatî û Çapemenîye yê QSDyî bi eşkerayîyêke da zanayene ke DAÎŞî hêrişê dewleta tirke ya îşxalkere xo rê sey firsendî dîyê û fealîyetê xo zêdînayî. 

QSDyî vat: ''Hucreyanê DAÎŞî vizêr şan xeylê hêrişê terorî kerdî. DAÎŞî bajarekê Mergeda yê Dêra Zorê de wesayîtêkê Hêzanê Dîsîplînî yê Leşkerî kerd hedef û tîya de yew şerwan şehîd bi.

Bajarekê Şihêlê de DAÎŞî wesayîtêkê dewrîye kerd hedef û yew şerwanê ma zî tîya de şehîd bi.

Bajarekê Dîbanî de bi roketê RPGyî îstasyonê awe kerd hedef, hêriş de zeraro madî qewimîya.

Nê hêrişî rîskê gandarbîyayîşê DAÎŞî zêdînenê û torra mabênê îşxalkeran û DAÎŞî eşkera kenê.''