Dewleta tirke 2016 de Bab, Ezaz û Cerablûs; 2018 de Efrîn; 2019 de Girê Sipî û Serêkanîyê û 2024 de zî Minbic îşxal kerdî. 10ê adare de mabênê Fermandarê QSDyî Mazlûm Ebdî û hukmatê Şamî de peymanêke ameye îmzakerdene. Goreyê peymane seba agêrayîşê asayî yê şarê herêmanê îşxalkerdeyan ganî şertî bêrî peydakerdene.

Mesuldaranê Rêxistina Heqanê Merdiman a Sûrîye-Efrînî ra Îbrahîm Şêxo, Şîrîne Reşîta efrînije û Endamê Komîteya Koçberan a Serêkanîye û avûkat Ciwan Îsoyî derheqê babete de ajansê ma rê qisey kerd.

Îbrahîm Şêxoyî vat: ‘’Ganî koçberî bi asayî bieşkê abigêrê. Serekkomarê hukmatê Şamî Efrîn zîyaret kerdibi û vatibi ke pêro efrînijî do bieşkê bi asayî abigêrê.La heta ke çeteyê îşxalkerî û dewleta tirke nê herêman nêteriknê agêrayîşo asayî mumkîn nîyo. Hema nê rojan de çeteyan xeylê kesî herêmanê îşxalkerdeyan de qetil kerdî. Rêxistinê heqanê merdiman agêrayîşê asayî yê şaran ra mesuldar ê. Ganî dezgehê mîyanneteweyîyî na babete de erkanê xo bîyarê ca.’’

Şîrîne Reşîd vat: ‘’Şarê Efrîn, Serêkanîyê û Girê Sipî wazeno ke bi asayî abigêro. La hema zî Sûrîye de asayîşê ganê merdiman çin o. Şar seba bawerîya xo yeno qetilkerdene. Kesayetê xo sey hukmatê Sûrîye pênase kenê herinda ke verê qirkerdiş, şîdet û hêrişan bigêro, bêveng ê. Ganî peynîya na bêvengîye bêra. Ganî hêverî sûcdarî bêrê muhakemekerdene û cezakerdene.‘’

Ciwan Îsoyî vat: ‘’Herêmanê îşxalkerdeyan de heqê merdiman, huqûq yenê binpaykerdene. Qirkerdiş, vurnayîşê demografî, îşkence, remnayîşê merdiman dewam kenê. Hukmatê Sûrîye yo newe Baasî ra xirabêr o. Ma hema nêeşkenê agêrayîşê asayî ser o qisey bikerê. Heta nika dewleta tirke herêmanê îşxalkerdeyan ra nêvejîyaya. Seba agêrayîşê asayîyî ganî îşxalkerî nê herêman ra şorê û îşxal biqedîyo. Dezgehê mîyanneteweyî ganî garantîya ney bidê. ‘’