Çarçewa zîyaretanê dîplomatîkan ê heyetanê xerîban û dezgehanê sivîlan de vizêr Komîserîya Azadîya Dînan a Mîyanneteweyîye ya Amerîka, selahîyetdarê Îdareyê Xoserî û rêxistinê komelê sivîlî yê Rojawanî kom bîyî.

Dayîreyê Têkilîyanê Teberî yê Îdareyê Xoserî, Kongreya Starî û PYD şaristanê Qamişloyî de heyetî reyde pêvînayîşêk kerd.

Heyetê Amerîka de sereka Komîserîye Nadine Menza û keşayê wîlayetê Tennessee Nashville Steve Burgerî ca girewt.

Heyetî hêverî Dayîreyê Têkilîyanê Teberî reyde pêvînayîş kerd. Hemserekê Dayîreyê Têkilîyanê Teberî Ebdulkerîm Omerî, cîgêrayox Ebir Êlîya, şêwirmende Mizgîne Ehmed û vervatoxe dayîreyî Kemal Akîfî heyet pêşwazî kerd.

Kemal Akîfî da zanayene ke înan qewimîyayîşanê Rojawanî ser o nîqaşî kerdî û vat: ''Ma heyetî rê zanayîş da ke herême de sûcê dewleta tirke dewam kenê. Pêvînayîşêk weş bi. Ma raporê  derheqê Heyetê Dînan ê Amerîka de qisey kerd. Ma zî raporê xo yê derheqê binpaykerdişanê heqanê merdiman de teslîmê înan kerd. ''

Heyetî dima Kongreya Starî zîyaret kerd. Endama Koordînasyonê Kongreya Starî Asya Abdullah û vervatoxa Kongreya Starî Remzîye Mihemed heyet pêşwazî kerd. Remzîye Mihemed derheqê pêvînayîşî de nê çîyî vatî: ''Ma pêvînayîş de xebatanê xo, rewşa cinîyan ê Rojawanî û sîstemê hemserekîye yê Îdareyê Xoserî ser o qisey kerd. Ma derheqê sûcanê dewleta tirke yê vera cinîyan de raporêk pêşkêşê înan kerd. Ganî heyet tedaya Amerîka bikero ke îşxalê dewleta tirke vindarna.''

Endama Heyetê Hemserekîya PYDyî Foza Yûsif zî pêvînayîşê bi heyetî de qala binpaykerdişanê heqanê merdiman ê dewleta tirke û cerganê ci kerde û heyetî rê eşkera kerd ke dewleta tirke demografîya herême vurnena, pakîya etnîke û dînîye kena. Foza Yûsif qetî kerd ke dewleta tirke têna seba kurdan nê seba pêro herême tehluke ya.

Heyetê Amerîka ard ziwan ke Rojawan de azadîya dîn û kulturan esta û seba mendebîyayîşê nê aramîye ê do paştî bidê Rojawanî.

Yeno pawitene ke heyet şoro Reqa û berpirsîyaranê Îdareyê Xoserî reyde kombîyayîş bikero.