Heta nika pêro dinya de tewr tay 2 mîlyon kesî pê vîrusê Korona kewtî û 160 hezar kesî zî Korona ra merdî. Hema herêmanê Rojawanê Kurdîstanî de vîrusê Korona nêame tesbîtkerdene. Labelê Heyva Sor a Kurdî pê paştdayîşê Heyva Sor a Kurdîstanî vera janî tedbîran gêno Heyva Sor a Kurdî çarçewa têkoşînê vera vîrusê Korona de Hesekê de nêweşxaneyê Covid-19î pê paştdayîşê Heyva Sor a Kurdîstanî awan kerd.

Nêweşxane goreyê krîteranê tibbîyan ê mîyanneteweyîyan ame amadekerdene û nêweşxane de her text ê bînî ra qasê 3 metreyan dûr o. Nêweşxane 2 beşan ra yeno meydan û tede 120 textî estê. Beşê yewinî de 60 textî estê û seba her textî zî tupêkê oksîjenî esto. Beşê diyînî de zî 60 textî estê. Eke nêweşîye vila biba nêweşxane dest pê xebate bikero.

Personelê nêweşxane doktor û kedkarê weşîye yê Heyva Sor a Kurdî yê. Doktor û kedkarê Heyva Sor do 3 rojan goreyê krîteranê Rêxistina Weşîye ya Dinya bêrê perwerdekerdene. Perwerde hetê dezgehê hetkarîye yê Îtalya UBB û Doktoranê Sînornenasan ra bêro kerdene.

Nêweşê ke tede şikê vîrusî estê 14 rojan do bigêrîyê binê karantîna û eke tede vîrus tesbît bibo nêweşxane de do bêrê cadayene. Eke Kantonê Cizîrî de nêweşîya kesêkî/e giran biba beşo diyîn ê 60 textî do bêro aktîfkerdene. Beşê yewinî yê nêweşxaneyî de her textî rê tupê oksîjenî esto la cîhazê helmgirewtişî çin o. Beşê diyînî de zî 5 cîhazê helmgirewtişî estê.