Dezgehê hetkarîye Heyva Sor a Kurdistanê seba hewcedarîyanê cuye yê se hezaran hemwelatijanê Rojawanî ke hêrişê dewleta Tirkî ya îşxalkare û çeteyanê aye ra koç kerd û seba ke dermankerdişê birîndaran, sey gama verên 500 hezar euro hetkarîya madîye erşawite.

Goreyê eşkerayîye Heyva Sor a Kurdistanê dimayê hêrişanê Tirkîya û çeteyanê aye seba şarê Rojawanî kampanyaya hetkarîye dabî destpêkerdene. Na kampanya bi hetkarîya nê dezgehan; Heyva Sor Kurdistanê Almanya, Heyva Sor  a Kurdistanî  ya Swîsre, Heyva Sor a  Kurdistanî ya Norweçî, Heyva Sor a Kurdistanî ya Ingilîstanî, Heyva Sor a Kurdistanî  ya Holanda, Heyva Sor  a Kurdistanî ya Belçîka, Heyva Sor a Kurdistanî ya  Îtalya, Heyva Sor  a Kurdistanî ya  Japonya, Roja Sor a Kurdistanî ya Swêdî, Roja Sor a Kurdistanî ya Awûstirya, Roja Sor  a Fransa, Heyva Sor a Kurd /Başûr û Heyva Sor a Kurd/Rojwanî  yena viraştene. Eşkerayîye de yena vatene ke dewleta Tirkî ya îşxalkare û çeteyanê aye 9'ê Teşrîna Verêna 2019 de bi armanco ke herême bi temamî sivîlan ra bêra vengkerdene, hêrişê Rojawanî kerd.

Dewleta Tirkî û çeteyê aye ne exlaq û ne zî qanûnê şerî nas kenê. Dewleta Tirkî Rojawan de doman, kalpîr zî tede sivîlan kena hedef. Bi bombaeştişê cayanê sivîlan rê asayîşê can û malanê sivîlan yeno çinkerdene. Keyeyî, bînayî, nêweşxaneyî, kampê multecîyan hetê dewleta Tirkî ra sey hedef yenê girewtene û yenê bambardûmankerdene. Ambulans û merkezê weşîye û xebatkarê Heyva Sor a Kurdistanê zî hêrişan de sey hedef yenê girewtene û yenê bombardûmankerdene. Nê hêrişanê barbarîyan de bi seyan kesî ameyî qetilkerdene û birîndarkerdene û 200 hezar hemwelatijê Rojawanî zî neçar mendî ke koç bikê û nika binê şertanê çêtinan de ciwîyayêne. Goreyê eşkerayîye na hetkarîya ke ameye erşawitene, seba cakerdişê multecîyan û weşkerdişê birîndaran do bêra xebitnayene. Heyva Sor a Kurdistanî eşkerayîya xo de vat ke hetkarîya înan a seba Rojawanî senî ke 8 serran ra nata dewam kena, do reyna dewam bike.