Wextanê peyênan de Qamişloyê Rojawanê Kurdîstanî pê xîretanê provakatîfan beno rojdem. Vizêr zî komêka bi nameyê Dîfa Wetanî ya peremîlîter a pabesteyê rejîmê Sûrîye kewte xîretanê sey verênan.

Mabênê cerganê Dîfa Wetanî û Hêzanê Asayîşê Zereyî de pêkewtiş qewimîya. Cerganê Dîfa Wetanî waşt ke herêma Meqasimî ya taxa Hêlokî ya Qamişloyî de noqtayan awan bikerê. Pêkewtişê peyênî dima ke rejîmî îfade kerd ke ê do noqtayanê ke Dîfa Wetanî wazeno, ronê qedîya.

Dima zî Hêzanê Asayîşê Zereyî pê makîneyanê karî noqtayê ke rejîmî waştêne herêma Meqasimî de awan bikerê, rijnayî. Alozîye naye ra dima qedîyaye.

Verê cû cerganê Dîfa Wetanî hêrişê noqtayêka Hêzanê Asayîşê Zereyî kerdbi. Rojanê vîyarteyan de zî heman cergan hêrişê wesayîtêkê asayîşî kerdbi û hêriş de endamêkê asayîşî şehîd bibi, endamêk zî birîndar bibi. Cerganê na kome rayîrê Selamî yê Qamişloyî de pê bombayêka vengî hêrişê noqtayêka asayîşî kerdbi. D rojî verê cû fermandarî nê cergan de teqayîşêk amebi meydan.