Hêzanê Asayîşê Zereyî yê Rojawanî derheqê hêrişê Dîfa Wetanî yê rejîmê Sûrîye de eşkerayîye daye û vat: ''Nê hêzî seba ke herême de alozîye bivirazê û asayîşê herême biherimnê qedexeyê vejîyayîşê teberî yê seba vîrusê Korona sey firsendêk vînenê.''

Hêzanê Asayîşê Zereyî vist vîrî ke 21ê nîsane cerganê Dîfa Wetanî taxa Hilko de hêrişê noqtayêka leşkerî kerd û vat: ''Dîfa Wetanî seba ke noqtaya hêzanê ma bivisnê detsî verê cû hêrişê ci kerd û bendî viraştî. Hêrişê ewroyînî (vizêrîn) de hêzanê ma cewabê nê hêrişan da.  Ma do vera hêzanê ke wazenê aramî û asayîşê herême biherimnê do bêveng nêmanê. Nê hêrişî qelsîya rejîmê Sûrîye û yê Dîfa Wetanî mojnenê. Nê hêzî nê wextî de ke şarê ma vera vîrusê Korona têkoşîn keno hêrişanê namerdan kenê. Ma goreyê vengdayîşê Neteweyan ê Yewbîyayeyan ê seba adirbirnayîşî têgêrenê la mîlîsê rejîmî nê vengdayîş binpay kenê. Nê cergî wazenê ke menga ramazanî ra verî herême de alozîye bivejê.''