Şerwananê Hêzanê Sûrîyeya Demokratîke (QSD) dewa Baxozî ya qezaya Hecînî ya Dêrazorî de çeteyê ke teslîm benê û keyeyanê înan wareyê şerî ra vejenê.

Şerwananê QSD'yî hetê bînî ra vizêr  13 domanî xelisnayî ke nînan ra 9 hebî  Êzidî, 4 hebî Tirkmenê şîa yê Telaferî yê.

Şerwananê QSD'yî dimayê xelisnayîşê domanan, herême ra vetî û hetkarîya lezkanî ra dima ê berdî herêmanê biasayîşan. Dimayê kontrolê weşîye û tespîtkerdişê nasnameyanê înan, domanî do bêrê leyê keyeyanê înan.

Şerwananê QSD'yî mabênê 4 serranê peyênan de Reqa, Tebqa, Minbic, Hesekê û Dêra Zorî de operasyonan de bi seyan cinî û domanê Êzidî xelisnayî û  resnayî keyeyanê ci. Çend rojî verê cû 7 domanê Êzidî Baxoz de ameyîbi xelisnayene.

Çeteyanê DAÎŞ'î 3'ê Tebaxe 2014 de seba îşxalkerdişî hêrişê serê Kurdanê Êzîdîyan ê Şengalî kerdibi û  bi hezaran cinî û domanî remnaybî û bazaran de sey koleyan rotîbî.

DAÎŞ'î 10-12'ê Hezîrane 2014 de zî hêrişê serê bajarê Telaferî yê Mûsilî kerdibi û xeylî Tirkmenê şîayî kiştîbî, zaf cinî û domanê înan zî remnaybî.