Dewleta Tirkan a ke zaf şar û bawerîyî qir kerdî nika zî kurdan ser o polîtîkayê xo yê qirkerdişî dewam kena. Dewrê Osmanîyan û awankerdişê Tirkîya de ermenî, asûrî, sûryanî, keldanî, rûmî, êzidî, çerkes û erebî yew bi yew ameyî qetilkerdene û tehcîrkerdene. Dima prosesê qirkerdişê kurdan û elewîyan dest pêkerd û hema zî dewam keno. Pêlê qirkerdişî yo ke Osmanîyan vera asuran, sûryanan û keldanan wextê Şerê Dinya yê Yewînî de dest pêkerd nika Rojawanî de dewam keno. Dewleta Tirkan seba ke Rojawanî îşxal bika xîret kena ke kurdan sînorî ra qase 30 kmyî biveja. Dewleta Tirkan se serran verê cû no polîtîka vera asûran xebitnabi û asûrî surgunê Sûrîye kerdibi.

Mexdûranê qirkerdişê Dewleta Tirkan ra yew zî Îşo Yûhanna yo. Keyeyê Yûhanna wextê qirkerdişê Seyfoyî de Qezaya Çelê ya Colemêrgî ra koç kerd Rojawanê Kurdîstanî. Yûhannayî ard ziwan ke ê reya verêne Serêkanîye de ca bîyî la rîyê gefanê Dewleta Tirkan ra ameyî Til Temirî.Yûhannayî ANFyî reyde qisey kerd û vat: "Ma Colemêrgî ra yê. Osmanîyan ferman da û ma koçê Iraqî kerd. Dima beşêkê ma Iraqî de beşêkê ma zî Serêkanîye de ca bîyî.  Wexto ke ma sînor ser o bîyî Dewleta Tirkan pare kerd ke no nêno qebulkerdene û gef ro Fransa werd. Fransa zî ma rê va ganî ma Serêkanîye de nêmanê û ma derbasê Til Temirî û Heseke bîyî. Dewleta Tirkan zorbaz û zalim a, sucdar a dişmena her kesî ya. Destpêkî de ma qetil kerdî, dima ê bînî û dima ê bînî. Şewa 23ê sibata 2015an de wexto ke DAÎŞ hêriş kerd Dewleta Tirkan zî fekê awbendan akerdî. Wextêko derg awe zaf berz bî. Armancê înan astengkerdişê hetkarîyan bi. Wexto ke DAÎŞ hêrişê ma kerd mi xo darêke ser o nimit û ez xelisîya. Dima ez xo resna YPGyî. Mi rê va ma do to berê Heseke mi va ney. Ez 3 mengan cayê YPGyî de menda. Dima YPGyî dewa ma xelisnaye. Merdimanê mi ke koç kerd mi rê zaf israr kerd ke ez zî koç bika. Cayêkê ez şora ci çin o, warê mi tîya yo. Mi înan rê zî wina vat û ez nêşîya.Biewnê Dewleta Tirkan Serêkanîye de se kerd. Melê her kesî vêşnayî. Malê şarî diznenê benê welatê xo. Dewleta Tirkan sucdar a. Pêro dinya zanena la kesêk zî çîyêk nêkeno. Wexto ke Tirkîya ma qetil kerdî zî kesêkî çîyêk nêvat. Eke ma pîya tevbigêrê ma eşkenê înan vindarnê."