Dima ke dewleta tirke û cerganê aye yê artêşa Mîllî ya Sûrîye Rojawan îşxal kerd şarê Rojawanî neçare mend ke koç biko. 

Îdareyê Xoserî seba koçberanê Serêkanîyê û Girê Sipî Hesekê de 64 dibistanî vurnayî kerdî cayê mendişî û bajarekê Tiwêna de Kampa Waşokanî ronaye. Dezgehêko mîyanneteweyî hetkarîye nêdano kampe û şarê kampe bi ameyîşê zimistanî mîyanê şert û mercanê zoran de ciwîyenê.

Kampa Waşokanî de ke têna hetê Îdareyê Xoserî û Heyva Sor ra yena paştî dayene bi tewrbîyayîşê koçberan ê peyênan nufusê kampe 5 hezar 700 ra bi zêde û resa 6 hezar û 200.

Îdarekarê kampe Hesen Yûsifî pare kerd ke semedê hewayî ra xebatê binawanîye û serawanîye vindertî û naye ra zaf koçberî seba mendişî neçare mendî ke pabeyê xebatan bibê. Yûsifî venga dezgehanê mîyanneteeyan da ke paştî û hetkarî bidê koçberan.