Kelaya xoverdayîşî Kobanê xerîtaya têkoşîn û qehremanîye mîyanê rîpelanê tarîxî de ameye neqşkerdene. Kurdî reya verêne raştê hêrişanê barbaran ê winayênan nêameyêne. La nêzanîyayêne  ke kurdan narey do tarîx binuştêne.

Serekkomarê Tirkîya Erdoganî vatêne ''Kobanê verê binkewtişî de ya, ha bin kewena.'' Bi xoverdayîşê şagîrtanê Rayberê Şarê Kurdî Abdullah Ocalanî Kobanê bin nêkewte û mojna her kesî ke do qetî bin nêkewa.

26ê çeleyê 2015î de Yewinanê Pawitişê Şarî (YPG) û Yewinanê Pawitişê Cinîyan (YPJ) mizgînîya Kobanê daye. Na mizgînîye bîye kila çinkerdişê barbarîya DAÎŞî. Dima ke cografyaya Sûrîye û Iraqî hetê DAÎŞî ra amebî îşxalkerdene Kobanê DAÎŞî rê bîye cayê binkewtişî yo verêne. Bi xoverdayîşê YPG û YPJyî Kobanê bîye sembolê xoverdayîşî. 

DAÎŞ key û senî awan bi

Goreyê tay çime û belgeyan DAÎŞ 2003 de hetê Abû Misab El Zerqawî ra ronîyayo û tay nameyan ra dima 2013 de nameyê 'Dewle Îslamîye fî Iraq wel Şamî' (DAÎŞ) girewto. Mabênê serranê 2014-2019î de DAÎŞî Sûrîye û Iraq de warêko hîra îşxal kerd. O çax welatanê cîyayan ra cergê DAÎŞî ameyî, înan sey Reqa, Dêrazor, Tîkrît, Felûc û Mûsilî şaristanê tewr pîlî yê Iraq û Sûrîye îşxal keerdî.

Çira Kobanê?

Kobanê o şaristan bi ke kilaya Şorişê 19ê Temmuze tede amebî vêşnayene. Cerganê DAÎŞî vatêne ''Ma do nimajê roşanî Kobanê de bikerê.'' Cergan waştêne ke şorişê şaran o ke Kobanê de dest pêkerdbi çin bikerê. Kobanê hetê cografya ra zî stratejîk bîye. Kobanê kantonanê Cizîre û Efrînî resnena pê. Bi belgeyan zî îsbat bi ke dewleta tirke zî na babete de paştdayîşêko xurtî da DAÎŞî.

15ê êlule de cerganê DAÎŞî bi çekanê giranan dest pê hêrişanê vera Kobanê kerd. Seba ke DAÎŞ nêreso merkezê Kobanê şerwananê YPG û YPJyî xeylêk çalakîyê fedayî dewa Telikê de kerdî ke Arîne Mîrkan zî wina yew Miştenûr de kerde.

5ê teşrîna verêne de cerganê DAÎŞî xo resna Kobanê. La YPG û YPJyî bi îrade û qerardarîyêka pîke soz dabi ke erdê xo war meverdê. Cerganê DAÎŞî bi çekanê giranan, tank û topan hêriş kerd. Destê şerwananê YPG û YPJyî de teyna çeka înan est bîye. Bi çekanê şenikan xoverdayîş 134 rojan dewam kerd.

Erdoganî o çax vat: ''Kobanê ha bin kewena, do bin bikewa.'' La şagîrtanê Ocalanî bi îradeyê xurtî verê armancanê DAÎŞî û hêvîya dewleta tirke girewt.

Kobanê bin nêkewte, bin vist

Kobanê bîye sembolê xoverdayîşî. Têkoşînê Kobanê yê vera DAÎŞî dinya rê bi mîsal. Barbarîya DAÎŞî bi xoverdayîş û îradeyê YPG û YPJyî bin kewte. Xoverdayîşê 134 rojan ra dima mizgînîya Kobanê ameye dayene. 26ê çeleyê 2015î de şerwananê YPG û YPJyî vat: ''Kobanê bin nêkewte, do bin nêkewa.''

Kobanê bîye destpêk. Dima bajarek û dewê Sûrîye hêdî hêdî ameyî azadkerdene. DAÎŞ Baxoz de gêrîya binê ablûqa. 3 hezar cerganê DAÎŞî xo teslîmê DAÎŞî kerd. Barbarîya DAÎŞî qedîyaye. No erd xeyrê domananê nê şarî ra xelisîya. Her kuçeyê Kobanê de rêçê qehremanan est o.

Dewleta tirke nêeşkaye verê binkewtişê DAÎŞî bigêra coka 2015î ra dima hêrişê Rojawanê Kurdîstanî kerd.