Rojawan  de çalakîyê 8ê Adare Roja Cinîyan a Dinya bi şîarê ''Ma do bi îradeyê cinîya azade polîtîkayanê qirkerdiş, îşxal û tecrîdî betal bikerê'' yenê kerdene.

Yewîya Cinîyan ê Ciwanan bi wesîleya 8ê Adare Roja Cinîyan a Dinya Kobanê de bi kincanê xo yê tradîsyonelan rayraşîyayîşêk organîze kerd. Rayraşîyayîş Meydanê Şehîd Egîdî de ame destpêkerdene û ehta Meydanê Cinîya Azade dewam kerd.

Rayraşîyayîş de posterê Raryberê Şarê Kurdî Abdullah Ocalanî ameyî kitiştene û solganê sey “Jin Jiyan Azadî” û  “Bê Serok jiyan nabe” ameyî vatene.

Vervatoxa Yewîya Cinîyan ê Ciwanan Neda Şahîn roja cinîyan sere de cinîyan ê ke koyan de semedê azadîye şer kenê heme cinîyan ê dinya rê fîraz kerd û vat: ''Tim wazenê ke heqanê cinîyan çîn bikerê la ma zî do tim vera şîdet, tecawuz û qirkerdişan rayîrê azadîye de têkoşîn bikerê. Cinîyî xeyrê Rayber Apoyî resayî na merhele.''