Yewîya Roşnvîranê Kobanê do mabênê 11 û 12ê kanûne de Kobanê de bi beşdarîya temsîlkaranê partîyan, roşnvîran, nuştoxan, akedmîsyenan û rîsipîyan komxebatêka yewîya neteweyîye bikrê.

Komxebate do bale bianca gefanê vera Kurdîstanî bitabetî Rojawanî ser û tewirê kurdan ê vera nê gefan do bêro ercnayene. Komxebate do di rojan dewam bika û yeno pawitene ke zaf  roşnvîrî, nuştoxî, akademîsyenî û temsîlkarê partîyanê sîyasîyan do tewrê ci bibê.

Hemsereka Yewîya Roşnvîranê Kobanê Leyla Ebdo derheqê komxebate de ANF reyde qisey kerd û vist vîrî ke kurdî prosesêkê krîtîkî de yê û vat gamê ke nê prosesî de yenê eştene do bêrê ercnayene.

Leyla Ebdo vat: "Komxenate de ma wazenê proseso hesas ê welatê ma do bêro muneqeşakerdene. Nê prosesê krîtîkî de ma wazenê tewirê şarê xo, sîyasetê xo û roşnvîranê xo biercnê."

Leyla Ebdo îfade kerd ke Kobanê seba yewîya kurdan şaristanêko sembolîk o û vat: "Na herême de bedelê giranî ameyî dayene. Coka zaf girîng o ke gama verêne ya yewîya neteweyî do Kobanê de bêra eştene."

Endamanê Komîteya Amadekarîye ya komxebate ra Mesud Mihemedî pare kerd: "Ma Kobanê de veng da her kesî. Pêro sîyaseymedarê xoserî zî ameyî vengdayene. Ma wazenê komxebatêka hera bikê û pêro şarê herême reyde behsê ameyoxê xo bikê. Ma do seba pawitişê destkewteyanê xo plansazîya xo bikê. Ma wazenê ke dormeyê sîyasetêkê hemparî de kom bibê."