Kobanê de şervana YPJyî şehîde Tolîne Pelşîn Baz (Emîne Ehmed) ya ke 25ê êlule de Minbic de hêrişê dewleta tirke de birîndar bîye û 27ê teşrîna verêne de şehîde bîye Şehîdgehê Şehîde Dîcle yê Kobanê de ameye definkerdene. Merasîmî de gerîlayê HPGyî Zinar Raperîn (Mihemed Hecî)  yo ke 16ê hezîrana 2023yî de Herêmanê Pawitişî yê Medya şehîd bi, ame yadkerdene.

Fermandaranê YPJyî ra Çîçeke Zagrosa ke merasîmî qisey kerd, şehîdî yad kerdî û vat: ''Şehîde Tolîn Pelşîn Baz vera polîtîkayanê çînkerdişê kurdan ê dişmenî xover da û tewrê kerwanê şehîdan bîye. Ma sey şarê kurdî xora raya verêne şehîdan rê çîçekan nêramenê. Wa dişmen nê hole bizano ke şarê ma tim cayê ma de yo ma do hêrişanê dişmenî bêcewab meverdê. Ma do gonîya şehîdanê xo erdî de nêverdê.Ma do bi xurtkerdişê têkoşînî hem Rayber Abdullah Ocalanî hem zî herra xo ya ke binê îşxalî de ya azad bikerê. Ma do çirey herra xo canêverdê. Ma do heta serkewtişî Rayber Abdullah Ocalanî û şehîdan teqîp bikerê.''

Bi nameyê keyeyanê şehîdan Tolîne û Zinarî zî qiseykerdişî ameyî kerdene û sozê xurtkerdişê têkoşînî ame dayene. Dima ra belgeyê şehîdan ê Tolîne Pelşîn Baz û Zinar Raperînî ameyî wendene û teslîmê keyeyanê înan bîyî.

Cenazaya şehîde Tolîne Peylîn Baz bi tîlîlîyan û sloganan ameye definkerdene.