Şervananê YPJ û YPG'î yê ke tewrê zaf hemleyan bîyî, derheqê Hemleya Firtineyê Cizîrî de ma rê qisey kerd. Şerwanan serkewtişê xo yê cepheyî dîyarîya hevalanê xo yê YPG û YPJ'î yê şehîd bîyî kerde.

Şervana YPJ’î ya Efrinije Dilar Helebe hemleyê ke a tewrê înan  bîya hendê zafê  ke hûmara înan xo vîra kerdî û vana, “Mi cayê xo hemleyanê Heleb, Şengal, Minbic, Reqa û zaf hemleyanê bînan de girewt. Ma; şervananê YPJ û YPG'î wexto ke ma vera Cephet El Nûsra, grûbanê qijan û tewr peynî de zî DAÎŞ’î yo ke kes nêeşkeno vera ci şer bikero, ma bawer kerdêne ke ma do rojêk ser bikewê. DAÎŞ’î bi serebirnayîşê merdiman ters kerdibi zereyê merdiman, la xoverdayîşê YPG/YPJ'î reyde no ters zereyê merdiman ra vejîya.”

ŞEHÎDA HEMLEYA DÊRAZORÎ RÛQEYYE

Dilere vana, seba aye zaf hêca yo ke tewrê hemleya vera çeteyan bîya, teba şehîdanê şorişî reyde rayîr ra şîya ya û wina dewam kena: “Dêrazorî ra vetişê çeteyan gamêka muhîm a, bi taybet zaf muhîm o ke cinîyan destpêk ra heta peynîye cayê xo nê şerî de girewto. Heme hemleyan de hevalanê cinîyan cayê girewt û şehîd bîyî. Mesela şehîda destpêkerdişî  ya Hemleya Dêrayorî hevalêka cinî ya. Hevala ma ya Ereb a ke nameyê ci Ruqeyye ya.  Muhîmîya nê şehadetî hem seba moralê ma hem zî seba xoverdayîşê ma zaf gird a.

TERSÊ DAÎŞÎ; TILÎLIYÊ YPJ'Î YÊ SERKEWTIŞÎ YÊ

Dilare bale ante serê tersê DAÎŞ’î yê YPJ'î û wina dewam kerd: “Na hemle de ma dî ke DAÎŞ’îyan vatêne, ‘ Wa ma bi destê 10 camêrdan ra bêrê kiştene, la bi destê cinîyêka  YPJ'î ra nêrê kiştene. Moral û tilîliyanê cinîyan ra zaf tersayêne, coka vatêne kema nêwazenê destê cinîyan ra bêrê kiştene. Xelisnayîşê cinîyan ê Êzidîyan bi destê YPJ'î seba ma û şarî ra bi morelêko gird. Serê bingeyê projeyê Rayber Apoyî, cinîyî zulm ra ameyî xelisnayene.” Dilare tewr peynî de çalakîya grevê vêşanîye yê verê tecrîdkerdişê Rayberê Şarê Kurdî Abdullah Ocalanî ard vîrî û da zanayene ke na çalakîye hêzê dana înan. Dilare ard ziwan ke, ê serkewtişê Hemleya Dêrazorî dîyarîya şehîdan, Rayberê Şarê Kurdî Abdullah Ocalanî kenê.

Şerwan Mûrat Qamişlo zî nameyê fermandaranê verînan ra yewî, ê Mûrat Qamişloyî nayo xo ra. Qamişlo ard ziwan ke o sereberzo alaya ke ey ra menda keno berz û vano: “Serra 2011 ra nata tewrê hemleyanê Til Hemîs, Minbic, Dêra Zorî bîya. Ma nika reştê peynîya Hemleya Dêrazorî. Nê serkewtişî dîyarîya Rayber Apoyî, şehîdanê Şorişî û xoverdayoxanê zîndanan kenê. Îşxalkerêk kotî bibo ma do ser de bişorê.”

ŞEHADET SEBA ÇIMEYÊ HÊZ Û MORALÎ YO

Bêrîtan Alîşêr a ke serra 2011 de pî, kek û birayê xo ya pîya cayê xo zereyê şorişî de girewto, ma rê qalê maceraya xo kena.  Bêrîtane ciwanêka YPJ'yî ya Hesekê ya. Bêrîtane hemleyanê Serêkanîye, Til Temir, Hesekê, Şeddadê, Minbîc, Reqa û tewr peynî de zî Dêrayorî de ca girewto. Alîşêre vana: “Şehîdbîyayîşê zaf hevalan mi rê giran bêro zî, nê şahedî çemeyê tewr gird ê moral û hêzî yê. Nê hemleyan ra serkewte vejîyayîşê ma heto tewr rindek ê nê karî yo. Serkewtişê Hemleya Dêrazorî destpêkerdiş de şehîdan û Rayber Apoyî, cinîyanê Êzidîyan û cinîyanê Ereban ê ke ameyê xelisnayene rê pîroz kena.

'DÊRAZOR ENCAMÊ XOVERDAYÎŞÊ MA  YO

Awzem Arîn a Dirbêsiyeyije, tewr hemleyanê Reqa, Kerema û Dêrazorî bîya. O suîkastbaz a. Awzeme vana, “Şehîdbîyayîşê hemrayanê ma seba ma zor o. Labelê zereyê şert û mercanê şerî de hêz danê merdiman. Ma bi nê hêzê, YPJ de mewzîyanê tewr verênan de ca gênê. Awzeme  ard ziwan ke, bi kede û cehkerdişanê înan DAÎŞ verê çinbîyayîşî de yo û vat, “8'ê Adare yê cinîyan pîroz kena. Xoverdayîşê grevê vêşanîye yê Leyla Guvene silan kena. Serkewtişê  ma yo  Dêraorî netîceyê xoverdayîşê ma yê bi qerardarîye  yo.”

KOBANÊ RA HETA DÊRA ZORÎ MA ÇINBÎYAYÎŞÎ RA ESTBÎYAYÎŞ AFERNA

Delîl Karabogan şerwanêkê YPG’î yo Kobanêyij o. Karaboganî bale ante serê îradeyo ke şerê Kobanê ra nata ser keweno û vat, “Amancê hêrişê înan ê vera Kobenê çinkerdişê şarê Kurdî bi. Ma zî ê şerî de cayê xo girewt. Rixmê heme çinbîyayîşan zî îradeyê ma xurt bi û bi tesîrê ney ma DAÎŞ û çeteyê Kobanê ra bin kerdî. Serkewtişo ke Kobanê de dest pêkerd ma vînenê ke ewro reso Dêrazorî. Hemleya Dêrazorî tayê menda ke biqedîyayo. Ma dî ke bi îradeyêko xurt merdim eşkeno vera her zehmetîye bivindo. Eşkena vaja, ma çinbîyayîşî ra estbîyayîş aferna. Verê  nê îmkanê ma çin bîyî. Ê yê ke zereyê her şert û mercî de do ser bikewê reyna ma yî.”