Xeylêk şaristananê Rojawanê Kurdîstanî de bi hezaran kesan Komployo Mîyanneteweyî yê 9ê Teşrîna Verêne şermezar kerd.

Qamişlo û Hesekê de bi hezaran merdiman Komployê vera Rayberê Şarê Kurdî Abdullah Ocalanî şermezar kerd. Çalakîyan de fotografê Rayberê Şarê Kurdî ameyî berzkerdene û vera Komployê Mîyanneteweyî sloganî vatî. Çalakîyan de pankartê sey 'Azadîya Rayber Apoyî bîyarê ca' zî ameyî akerdene.

Roniştoxanê Efrîn û Şehba zî bi şîarê 'Ma Komployê vera Rayber Apoyî şermezar kenê' Şehba de çalakîyêka rayraşîyayîşî kerde. Dima dewa Mirata de mîtîng ame kerdene. Mîtîng de xetlêk temsîlkaranê dezgeh û rêxistinan qisey kerd.

Hemsereka Meclîsê Kantonê Efrînî Zelûxe Bekir û Endamê Meclîsê Kantonê Şehba Mihemed Wêsî ANFyî rê qisey kerd. Înan komplo şermezar kerd û vat: ''Ma komelê mîyanneteweyî û pêro dezgehanê heqanê merdiman ra wazenê ke wa azadîya Rayber Apoyî bîyarê ca.''

Dêrik, Girkê Legê, Çilaxa û Til Koçer de zî şar vejîya meydanan û herême de pêro dikanî ameyî qefilnayene. Bi hezaran kesan bi sloganan çalakîya xo kerde û tim fotografê Rayberê Şarê Kurdî berz kerdî. Dima zî girse mîtîngêk kerd.

Reyna herêma Firatî de zî girseyan bi fotografanê Rayberê Şarê Kurdî çalakîya xo kerde û azadîya Ocalanî waşte.