Hetkarê Hemserekê Îdareyê Xoserîya Demokratîke yê Rojawanî Bedran Çîya Kurdî vat dewleta tirke herêmanê ke îşxal kerdî wazena bikera sey Efrîn, bikera merkezê cergan û cergan Lîbya ra heta ver bi Yemenî bera.
Hetkarê Hemserekê Îdareyê Xoserîya Demokratîke yê Rojawanî Bedran Çîya Kurdî derheqê hêrişê peyênî de ANFyî reyde qisey kerd.
Bedranî ard ziwan ke no hêriş cara hêrişêko plnakerde bi û dewleta tirke nêwazena kurdî herême de bimanê. Bedranî vat: ''Dewleta tirke Serêkanîyê û Girê Sipî yê ke ê îşxal kerdî wazen abikera sey Efrîn. Wazena înan bikera merkezê cergan û cergan Lîbya ra heta ver bi Yemenî bera. Dewleta tirke pêro welatan rê gef wanena.
Ez bawer a ke alozîya mabênê DYA û Rûsya do sey şerêk dewam nêkera, nê mutefîqê yewbînan ê. Rûsya wazena ke neteweyanê bînan reyde vera DYA rayaumûmîye awan bikera. Seba ma sey Îdareyê Xoserî asayîş û aramîya herême girîng ê. Ma seba her kesî vanê ke 'Wa kesêk zî xo nêkero mabênê nê di hêzan.' Ma meseleyanê xo pê rayîrê dîyalogan çareser kenê. Ganî her kes paştî bido Îdareyê Xoserî û QSDyî.
Dewleta tirke Îdlîbî ra cergan şawena Efrîn, Serêkanîyê û Girê Sipî. Wazena ke herême bi hawayêkê sîstematîk veng bikera, demografîya herême bivurna. Vera terorê nê cergan bêvengîye esta. Ma kerdişanê înan ra DYA û Rûsya sey berpirsîyar vînenê. Pêkerdişê înan ê Tirkîya reyde herême ameye îşxalkerdene.
Pê hêrişê 28ê nîsane zî ame armanckerdene ke herême bêra vengkerdene. Înan waşt ke şar bitersnê. Dewleta tirke dest nana keyeyanê kurdan û kurdan remnena. Herême de seba cergan kampan awan kena. Tirkîya wazena tîya de cerganê xo perwerde bikera û înan bierşawa rojhelatê Firatî, Lîbya, Yemen, Ewropa. Dewleta tirke nê koman ser o sîyaset kena.''
