Hozan Peyanîso ke şerwanêkê azadîye bi, çend serrî verî di lingê ci zî serê çokê ci ra qerifîyayî. Mîyanê refanê azadîye de raywanîya ey derg nêba zî ey zaf çîyî tecrube kerdî.

Sibata 2018î de dormeyê adirî de ma yewbînî şinasnayî. Akademîya Şehîd Rizgar Wanî newe qedîyabî, rojnuşteyê embazanê birîndaran kerdêne kitab û broşurî nuştêne. Tek taybetmendîya ke ey embazanê bînan ra cîya kerdêne, nêbîyayîşê linganê ci bi. Ey bi gandarbîyayîşê xo bale antêne. 2015 ra heta şehadetê xi serê kursîyêke de bi. Hozanî babete ser o wina vatbi: ''Mi lingê xo rayîrê têkoşînî de dîyarîya azadîye kerde. Naye ra rindêr çîyêk çin o.''

Hozan 2013 de Wanî de verê xo dano koyan. 2014 de yeno Rojawan û xeylêk cepheyan de vera DAÎŞî şer keno. 2015 de dewa Menacirî ya Serêkanîyê de teqayîşê mayînî ra di lingê ci çokanê ci ra qerifîyenê. Embazê ey Alîşêr Hozanî gêno milê xo û beno cayêkê dûrî.

Hozan wina qala ê helan keno: ''Ê helî zaf nênê vîrê mi. Bombayî teqayî. Seba ke ez weş menda her kes mat mend. Embazê m Alîşêrî ez weş verda.''

Embaz Hozan dima mîyanê Komîteya Birîndaran de ca gêno û tewrê xeylêk aktîvîteyan beno. La zerrîya ey de tim agêrayîşê koyan est bi. O qet nêvindertêne, ê karî ra vazdayêne karêkê bînî. Ey vatêne: ''Her ke xebirîyena nefes yeno mi. Wexto ke vindena mi rê wina yeno ke nefesêkî nêgêna.''

Seba ey govend girewtiş azadîye bi. Coka pê kursîyê xo govende zî girewtêne. Heta ey wextêk rojnamegerîye zî kerde.

Raywanîya ey Vakurê Kurdîstanî de dest pêkerd û Rojawan de zî nêqedîyaye. Ey xo resna Başûr zî. Embaz Hozan 8ê hezîrana 2020î de tewrê karwanê şehîdan bi.