Cerganê dewleta tirke yê Artêşa Milî ya Sûrîye (SMO) 29ê teşrîna peyêne de hêrişê Şehba kerd. Meclîsê Kantonê Efrîn-Şehba seba asayîşê şarî bire daye ke şar koçê herêmanê asayîyan bikero. Koçberan ra Şîrîne Îbîş qalê serebûtanê koçî kerd.

Şîrîne da zanayene ke 2018 de a hema ke veyva newîye bîya neçare menda ke Efrînî ra koç bikera. Şîrîne vat: Ma bi zehmetî resayî Reco. Ma wextêk Cindirês de mendî û dima derbazê Şehba bîyî. Şaristan de kaosêko pîl est bi coka ez û mêrdeyê mi têkilîya ma birîyaye. Dadîya mi zî qehr û dejê Efrînî ra dinyaya xo bedilnaye.

Til Rifet de zî hêrişî nêqedîyayêne. Di-hîrê rojî parçeyê topan kewtêne mîyanê keyeyî. Ma wina 7 serran Şehba de zî hêrişan ra ant. Ma Şehba ra zî koç kerd. Ma hêverî şîyî Tebqa û dima zî ameyî Reqa. Seke kabus bi. Zeytûnêrê ma, keyeyê ma, her çîyê ma şîyî. Çîyêk nêmend. Domanê ma û cinîyî do senî bi asayî biciwîyê. Ma hêrişan ra neçare mendê ke Şehba ra vejîyê. 

Cergan wextê koçkerdişî de ma rê teda kerdêne. Ez, mêrdeyê mi û domanê mi, ma siwarê motosîkletî bîyî. Cuyêka nedîyare ma dejînena. Ma hema zî gêrenê ke rayîrê ciwîyayîşî bivînê. Ma do qetî hêvîya xo, xo vîr a nêkerê û bi xoverdayîşî ser bikewê. Çunke no ware wareyê ma yo.''