Îşxalê dewleta Tirkîya û qolanê ci ra serkewte bi se hezaran Efrînijî mecbur mendî ke erdê xo caverdê û hêrema Şehbayî de ca bibê. Tena Efrînijî ney bi se hezaran Surîyeyijî yê şaristananê bînan ê ke koçê Efrînî kerdîbî bêçare mendîbî ke reyna koç bikerê. Nurî Adnano Tirkmen o ke dewa Karagoz ê hêrema Şehba ra yo nê multecîyan ra yew o ke zaf wextan koç kerdo. 

Nûrî Adnanî rewşa şaranê Şebhayî û Efrînî dinya rê beyan keno ke bi îmkananê xo ajansê ‚Rumaf’î ronayo. Serra 2018’î de bereyî projeyekê resiman rê keno ke domanê Efrinî bieşkê şer û zehmetîyanê koçberîye bi hîsan û çimanê xo vajê. Projeya ke teba çend resamanê profesyonel ê Efrinî arda were de serra 2018’î de 250 metre, serra 2019’î de zî 500 metre paçê kanî kampa Xoverdayîş û Serdemî de kerdî a ke bi hezaran domanî hîsanê xo nê paçan ser o xêz bikerê. Nûrî Adnanî derheqê armancê projeyî de ANF’yî rê qisey kerd. 

Pêrp Qolê ke Derbazê Surîye Bîyî Tirkîya Ser o Ameyî

Adnanî ard vîrî ke serra 2011’î de serebutê ke qewemîyayê hetê her kesî ra ameyî dîyene û vat „Destpêkî de merdiman waştêne ke azad bê. Labelê qolî ke vejîyayî warye her çî kewt têmîyan. Serra 2012’î de qolî hêdî hêdî kewtî dewanê Şehbayî. Qolê Osoyî, El Nûsrayî Tirkîya ser o derbazê Şehbayî bîyêne. Nê qolan demanê cîyayan de nameyê cîyayî nayêne xo ra. Labelê nişkavera DAÎŞ awan bî. Ma fehm nêkerd ke na yewe senî qewemîyaye. Labelê ê demî de kesekê bi nameyê Ebû Dicene yê Mereşî estbî mîyanê qolan de ame. Gelekî baş tirkî zanitêne û nameyê erebî xebitnayêne. No merdim kesanê ke qolê îdare kerdêne ra yew bî. 

Înan ra verî cuya ma ya başe bîye. Labelê qolî ke ameyî her çî bî xirabin. Ma jî nêeşkayme ke îdare bikerê û tîya ra vejê. Tena Tirkmen ney, Kurd, Ereb û şarê bîn zî vejîyayî. Ma derbazê Helebî bîyî. La Helebî de zî eynî serebutan dest pêkerd. Dima ra ma ameyme Efrînî. Ma Efrînî de rewşeka başî de bîme. Sîstemeko demokratîk hetê îdareyî ra ameybî ronayene. Her kes tewrê nê sîstemî bîyêne. Girîng nîbî ke merdim kamcîn ziwanî qisey keno û çikesij o.“

'Qolan Pêro Keyeyan de Bombayî Kerdîbî ca’

Adnanî ard vîrî ke vera galanê îşgalkerdişî yê Dewleta Tirkan Efrînijan 58 rojî xo ver da û vat „Dima ma mecbur mendîme ke derbazê Şehbayî bibê. Şarê hetê ra Cebel Ehlam ra vejîyayêne hetê ra zî bîyêne hedefê sekwanan. Gelek merdimî rayîr de ameyî kîştene. Ma ke ameyî Şehba şertanê giranan de ciwîyayî. Her dewe, her şaristanokê Şehbayî şer de ameybî rijnayene. Qolan her keye de bombayî kerdîbî ca.

Gama ke merdiman waştêne ke bikewê keyeyan bombeyî teqayêne. Seba nê şarî se ra yew zî hetkarîye teber ra nêame. Ma Efrîn de mîyanê cuyeka demokratîk de bîme ke ma cayekê bîn de nêdîbî. Serra 2011’î ra verî ma cuyeka winasîye nêzanitêne. Ma ke şîyî Efrîn ma yew cuya winasîye dîye. Nika zî Şehba de merdimî bîyê sey goşt û nênûgî. Şarê Efrînî nêzdîyê di serrî yo ke tîya ciwîyeno. Labelê mîyanê şarê Şehba û Efrînijan de têkilîyeka se serrine esta. Mîyanê keyeyan de xizmîye esta. Nêzdîyê 50-60 dewê Şehba tena Kurd ê. 

Mi waşt ke çîyê ke Dewleta Tirkan, qolanê OSOyî û qolanê bînan  nê şaran rê kerdê nîşanê pêro dinya bida. Mi dî ke bi hezaran qolî Ezazî ra derbazê Efrînî bî. Ma qolê tewr girîng ê DAÎŞî nê dewan de dî. Mi zî waşt ke bi karê xo yê ajansî nê pêro çîyan biresna dinya. Bi nê awayî mi ajansê Rumafî awan kerd."

Domana ke Birîya Kesaya Xo Kerdibî

Adnanî ard ziwan ke demo ke zerê kampa Şehbayî de gêrayo gelek çî dîyê û vat „Ma gelek dejê domanan dî. Domanan birîya wendegehê xo kerdêne, birîya keyeyê xo kerdêne. Ma gelek domanî dî ke timî bermayêne. Demo ke mîyanê şarî de gêrayêne di çîyan mi ser o zaf tesîr kerd. Ma Til Rifatî de şîme hetê keyeyekê Efrînî. Ma do bi mayeke ra roportajek bikerdêne. Kênayeka a maye bîye, hîna panc serrî bîye. Bermayêne. Mi ra vat ke wexto ke Efrînî ra vejîyaye nêeşkaya ke kesaya xo bîyara seba aye bermayêne. Reyna domaneko hewt serî seba ke pisinga xo Efrîn de caverdaybî bermayêne. Yewî birîya daranê zeytûnan, yewî birîya wendegehî, yewî zî birîya keyeyê xo kerdêne.“

Adnanî destnîşan kerd ke ey ke nê pêro çî kampan de dîye bi embazanê xo Henîf, Hemo, Erdalan û Heysemî ya birre daya ke îmkanek biafirnerê ke domanê Efrînî, hîsanê xo bi resiman neqiş bikerê û netîce de zî domanan gelek resimê balkêşî xêz kerdê.