Fermandarê Pêroyî yê Hêzanê Sûrîye ya Demokratîke (QSD) Mazlûm Ebdîyî derheqê qewimîyaşîyanê peyênan ê Rojawanî  de vizêr  Ronahî Tvyî rê qisey kerd.

Ma leteyêkê Sûrîye yê

Mazlûm Ebdîyî ard ziwan ke ê do heme bînayanê Îdareyê Xoserî de beyraqa Sûrîye bidaliqnê û vat: ''Ma kongreya verêne ya YPGyî de na beyraqe qebul kerdbî. Problemê ma bi na beyraqe çîn o. Heta nika rîyê şerê zereyî ra ma beyraqa xo ya taybete şuxulnayêne la nika reşwe bedilîyaye. Sûrîye de nika yew beyraqe yena şuxulnayene. Ma zî sey leteyêkê Sûrîye do na beraqe bişuxulnê.''

Turbeya Suleyman Şahî

Mazlûm Ebdî derheqê Turbeya Suleyman Şahî ke verê Qereqozaq de bi û dima ra ame kiriştene vizêr hesabê xo yê medyaya sanale de parekerdiş kerdbi. Ebdîyî derheqê nê dî zî wina vat: ''Pêkerdiş çîn o. Xeylê çîyî yenê vatene. No heqê huqûqî yo mîyanneteweyîyî yê Tirkîya yo. Derheqê nê de xeylê problemî vejîyayî ma zî vat semedê ma problem nîyo. Hêzê koalîsyonê mîyanneteweyîyî yê ke mabênê ma de Tirkîya reyde pêvînayîş kenê. Ê do Tirkîya ra cewabêk bigêrê ma zî çîyo ke hewe keno do bikerê.''

Adirbirnayîşê Minbicî hema dewre nêkewt

Mazlûm Ebdî persê derheqê Mibicî wina cewab kerd: ''Ma adirbinayîşêk îlan kerd. Hêzê koalîsyonê mîyanneteweyîyî zî tede yê. Tirkîya reyde pêvînayîşî ameyî kerdene , ma zî no qebul kerd. La hema hêrişî nêvindertî. Qereqozaq û zereyê Minbicî de hema hêzê ma est ê, vindetê. Pêkerdişêk ame kerdene ke ganî hêzê leşkerî Minbic de memanê û Minbic bi xo xo îdare bikero. Hêzê ke Minbic de yê nika ney  nêanê ca. Çunke no pêkewtiş hema dewre nêkewt. Ma hêvî kenê ke no pêkewtiş siba bikewo dewre. Ma do bivînê ke ê çend goreyê pêkerdişî têgêrenê.''

Kobanê pêro dinya eleqedar kena

Mazlûm Ebdî derheqê hêrişanê vera Kobanê de nê vatî: ''Pirdê Qereqozaqî de hêriş ame kerdene. No zî bi sebebê tehlukeyî. Waştişê înan o bi ke Kobanê bigîrê binê ablûqa. La embazanê ma bi hewayêkê qehremanîye verê nê girewt. Na meselyêka muhîm a.  Na meseleya têna Kobanê û Rojawanî eleqedar nêkena dinya eleqedar kena. Ma vera hêrişan her qeyde tedbîrî girewtî. Ma senî ke DAÎŞ Kobanê ra vet ma do reyna vejê. Dostê ma yê mîyanneteweyîyî est ê. Ma hêvî kenê ke pêkerdişê Minbicî pêro cayan de do bêra caardene.''

Firat do bibo sînor

Mazlûm Ebdîyî ard ziwan ke bado ke HTŞyî Şam girewt cayê ke artêşa Sûrîye ra bîyî veng QSD şi nê cayan ke verê DAÎŞî bigîro û wina vat: ''Vera tehlukeyê DAÎŞî ma pîya bi koalîsyonê mîyanneteweyîyî qerar girewt ke wextêk nê cayan kontrol bikerê. Senî ke yeno vatene semedê wextê dergî nêbi. Ma hêzanê HTŞyî reyde pêkerdişêk kerd. Hêzê ma çend rojî mendî û bado  ke karê înan qedîya ancîyayî cayê xo yê verênî. Firat do bibo sînor. Ma wina pêkerdiş kerd. Ma hêvî kenê ke no mexeripîyo.''

Semedê çareserîye pêvînayîşî yenê kerdene

Mazlûm Ebdîyî persê ''Mabênê HTŞ û QSDyî de pêvînayîşêk est o?''  wina cewab kerd: ''HTŞ hema ke verê xo nêdabi Helebî ma rê xebere şawite û vat hedefê înan QSD û kurdî nîyê. No pratîk de zî heta nika ame ca. Tay problemî bîyî. Grûbanê Tirkîya hêrişê Til Rifat û Şehba kerd. Ma şarê xo tîya ra vet. Nika hêzê ma Heleb de est ê. Mabêna ma wirdan de wezîfedarî est ê. Semedê çareserkerdişê probleman pêvînayîş kenê. Ganî pêvînayîşî hîra bê. Ganî hêzê ma şirê Şam. Semedê nê xebatê ma est ê. Ma leteyêkê Sûrîye yê. Ganî ma problemanê xo Şamî reyde çareser bikerê. Kam Şam de yo ganî ma nînan perûne reyde pêvînayîş bikerê.''

Ebdîyî derheqê rexneyanê ''Qey verî ra semedê Til Rifat û Şehba tedbîrî nêameyî girwtene'' de wina vat: ''Tirkîya rûsanê reyde pêvînayîş kerd û vat HTŞ do hêriş bikero. Rûsan ma ra hetkarîye waşte. Ma zî vat ma nêeşkenê înan rê hetkarî bikerê ma do xo bipawê. Esadî semedê şiknayîşî hêrişî tay hêzê xo şawit bî Idlibî. Hayîya ma hêrişan bibî la ma nêzanayêne ke artêşa Sûrîye wina lez xo peyser ancena.''

Dewrê neweyî dest pê kerd

Mazlûm Ebdîyî wina dewam kerd: ''Sûrîye de dewrê neweyî dest pê kerd. Esadî destûr nêda çareserîya sîyasîye. La nika semedê çareserîya sîyasîye pêvînayîşî est ê. Çend kenê derg bewlî nîyo. Çunke eşkerayîya fermî çîn a. Rojhilatê Firatî ma û rojawanê ci de cayê ke SMO û HTŞ kontrol kenê est ê. Nika proseso sîyasî dest pê keno. Ma do çîyo ke hewce keno bikerê. Ganî temsîlkarê her hetî nê demî de ca bigîrê. Ma vera her çîyî tedbîranê xo genê. Seba ke ma her cadê heqanê xo bigîrê, wextê yewîye yo.

Wextê ci yo ke her kes agêro herra xo

Wexto ci yo ke her kes agêro herra xo ke caverdaya. Mesele bi çeke çareser nêbena. Ganî efrînijî agêrê herra xo. Kesê ke Efrîn de ameyî cakerdene agêrenê cayê xo. Efrîn nika beno veng. Ganî efrînijî agêrê. No bi xo nêbeno ganî pêkerdiş bêro kerdene. Ganî şarê Serekaniyê, Girê Sipî agêrê herra xo. Ganî bi şerî nê bi dîyalogî problemî bêrê çareserkerdene.

Ganî çew teber de nêmano

Temsîlkarê Rojawanî tewrê pêvînayîşanê verênan nêbîyî. Şarê Sûrîye ra se ra 40 pêvînayîş de çînbi. Coka nê pêvînayîşî ser nêkewtî. Ewro ra tepîya pêvînayîşî do bi tewrbîyayîşê şarê Sûrîye bibê. No ma keno şa.Şarê ma ganî dahîna rêxistinkerde tewrê prosesî bibo. Eke proseso sîyasî beno ganî çew zî teber de nêmano.

Tirkîya cehd keno ke verê çareserîye bigîro

Grûbê ke Minbic de vera ma şer kenê gama ke ma înan reyde pêvînayîş kerd vanê 'ganî Tirkîya ma de qisey bikero.' Bê Tirkîya qerar nêdanê. Tirkîya zî bi tank, top û teyarayanê xo seba ke çareserîye mebo çîyo ke destê ci ra yeno kena. Ganî şarê Sûrîye problemanê xo bi xo çareser bikerê. Tirkîya ganî qebul bikero ke ma hêzêkê Sûrîye yê û herra xo de yê. Nika her ca de şer qedîya; têna Tirkîya û grûbê ci şer, pêkewtiş vejenê. Ganî her kes hinî nê bivîno. Ganî hetê kurdan bibê yew û wina têbigêrê. Cîyabîyayîş nêbeno. Xo mîyan de fîkrê ma yew nêbê zî ganî ma vera teberî yew bê. Ma hêvî kenê ke hêzê Kurdîstanê Federe nê prosesî de rolê xo yê pozîtîvî kay kenê.''

Hewcedarîya yewîye est a

Mazlûm Ebdî persê ''Serê hêzanê mîyanneteweyîyî ra pêkerdişêkê şima est o?'' wina cewab kerd: ''Na mesele de ganî ma zelal bê. Heta nika serê Şehba, Til Rifat û Minbicî ra hêrişî bîyî. Tirkîya wazena hêrişanê xo bidomno. Semedê vindarnayîşê hêrişan serê ci de zextêk est o la no nîno o mana ke hêrişî do bivindê. Semedê adirbirnayîşê pêroyî xebatî est ê, cehdkerdişê ma yê dîplomatîkî est ê. Dostê ma mabênê ma de gureyenî. Qala herêma bêçeke yena kerdene. Ma hazirê ke derheqê her çî de pêvînayîş bikerê. Tehluke nêverto. Hema tehdîtî est ê. Wa şarê ma hîşyar bo. Ma wextê îstîsna ra ravêrenê. Her wextî ra zaf yewîya ma hewce kena. Wa şarê ma cayê hêzanê xo de vindero. Ma nê rojî verî zî cîyayeyî. Ma rojê zehmetî verênî bi paştdayîşê şaarê xo, xo dima verdayî ma do reyna nê rojanê zehmetan xo dima biverdê.''