Serfermandarê Hêzanê Sûrîyeya Demokratîke (QSD) Mazlûm Ebdîyî Hesekê de derheqê hêrişanê îşxalî yê dewleta tirke yê vera herême de eşkerayîyêke daye çapemenîye. Ebdîyî da zanayene ke dewleta tirke têna Rojawanî nê pêro Sûrîye kena hedef û vera hêrişan mesajê yewîyêka xurte da.

Ebdîyî pare kerd ke mumkîn nîyo ke dewleta tirke ser bikewa û ê amade yê ke cewabê hêrişan bidê. Ebdîyî vat: ''Hêzê ma yê leşkerî vera her hêrişî amade yê ke xover bidê. 4 rojê peyênî zî îsbatê ney ê. 19ê teşrîna peyêne ra nata hêrişê dewleta tirke vilayê pêro Rojawanî benê. Hêrişan de bi taybtî dibistan, bînayê xizmetî, binawanî, îstasyonê herême, nêweşxaneyî ûsn. yenê hedefkerdene. Wextêkê dergî ra nata vera herême hêrişî ameyêne kerdene La nê hêrişê çar rojanê peyênen asta newîye û tehlukeyan mojnenê.''

Ebdîyî dima bîlançoya hêrişan eşkera kerde: ''Heta nika çar şerwanê QSDyî şehîd bîyî, 15 sivîlî şehîd bîyî. Heta nika 4 hezar ra zêdeyêr hêrişî ameyî kerdene ke nînan ra 67ê ci hêrişê hewayî, ê bînî zî hêrişê bi obus û topan bîyî. Hêrişî hema zî dewam kenê.QSD amade yo ke cewabê hêrişan bido. Hêzanê QSDyî nê çar rojan de îsbat kerd ke ê eşkenê Rojawanî bipawê. Ez înan fîraz kena.

Şarê ma roja verêne ra tewirê xo mojnayo. Ma şehîdî dayî  la rixmê ney zî şarê ma tewirê xo rê tawîz nêda. Dewleta tirke armanc kena ke herême veng bikera û xerîban tîya de cabikera. La şarê ma erdê xo nêterikna. Şarê ma wayîrê şehîdanê xo vejîya. Ma zî soz danê ke têkoşînê şehîdan ser o şorê. Ez pê bawer a ke şarê ma nê xoverdayîşê xo rê dewam bikero.''

Serfermandar Mazlûm Ebdîyî pare kerd ke dewleta tirke cara seba îşxalê Rojawanî gêrayêne bahaneyan û senaryoyan û vat: ''Hêrişê Îstanbulî (Taksîm) seba îşxalê Rojawanî senaryoyêk bi. Yew eleqeyê ma yê bi ê hêrişî çin o.''

Ebdîyî bale ante hêrişê Karkamişî ser û vat: ''Yew eleqeyê ma yê bi hêrişê Karkamişî yan zî hêrişanê sey Karkamişî çin o. Ma erdê Tirkîya qetî hedef nêkenê. No hêriş zî seba ke hêrişê vera Rojawanî bêrê hîrakerdene ameyo kerdene.''

Ebdîyî îfade kerd ke ganî hêrişê vera Rojawanî vinderê û seba ney pêro terefê eleqedarî seba ney xîret bikerê.

Ebdîyî derheqê eşkerayîyanê dewleta tirke de vat: ''Dewleta tirke îdîa kena ke hêrişanê xo yê hewayî bivurna hêrişanê erdî. No gefê Erdoganî yo verên nîyo. La hêrişê erdî hende rehet nîyê. Ma zî şarê ma zî amade yê ke vera hêrişanê erdî cewab bidê. Dewleta tirke tim herême tehdît kena. Dewleta tirke do nêeşka seba hêrişanê erdî bi rehetî têbigêra yan zî dinya îqna bikera.''

Ebdîyî da zanayene ke ver her tewirê hêrişî QSD do mesuldarîya xo bîyaro ca û vat: ''Eke şer dest pêbikero tîya de nêmano û vilayê her cayî bibo; xoverdayîşêko pîl vejîyo meydan. Dewleta tirke sey plananê xo do nêeşka erdê ma îşxal bikera.

Ma û dostê ma yê ke ma pîya vera DAÎŞî şer kerd, seba ke verê hêrişan bigêrê xîret kenê. Ma do tim bi zelalî şarê xo rê agahîyan bidê. Ma şarê xo û hêzanê xo reyde nê prosesî îdare bikerê. Wa şarê ma xoverdayîşê xo rê dewam bikero û hetê hêzanê ma de vindero. Ma prosesêkê zehmetî de yê. Heta ke no proses bi serkewtişî biqedo ma do xo ver bidê.''

Serfermandarê QSDyî Mazlûm Ebdîyî peynîya eşkerayîya kombîyayîşî de wina vat: ''Ma sey hêzanê leşkerîyan xoverdayîş û têkoşînî pîl bikerê. Temasê ma yê leşkerî, sîyasî û dîplomatîkî dewam kenê. Ma do meverdê ke dewleta tirke biresê armancanê xo. Ma hetê sîyasî û dîplomatîkî ra noqtaya tewr bihêze de yê. Dewleta tirke zî her wextî ra hîna zaf qels a. Mumkîn nîyo ke dewleta tirke ser bikewa. Her çî ra ver ma pê şarê xo û hêzê xo bawer ê. Ma pê bawer ê ke şarê ma û hêzê ma yê leşkerî netîceya xoverdayîşê xo yê hemparî de do ser bikewê.''