Bajarê Hesekê yê Rojawanî de hetê Merkezê Cigêrayîşanê Stratejîkan ê Rojawanî (NRLS) ra  Komxebata Lozanî ame organîzekerdene.

Ewropa û welatanê Rojhelatê Mîyanênî ra bi desan huqûqnasî, sîyasetmedar û cigêrayoxî tewrê komxebate bîyî. Hemsereka Meclîsê Rayberdişî yê Îdareyê Xoserî yê Rojawanî Bêrîvane Xalid, partîye sîyasîyî, têxistinê komelê sîvîlî û temsîlkarê merkezê cigêrayîşî zî tewrê ci bîyî. Komxebate de do hîrê roniştişî bêrê kerdene.

Hemsereka Meclîsê Rayberdişî yê Îdareyê Xoserî yê Rojawanî Bêrîvane Xalid qiseykeridşê xo de ard ziwan ke kurdî do destûrê lozanêkê neweyî medê û veng da rêxistinanê huqûq û heqanê merdiman ê mîyanneteweyî ke wa paştî bidê têkoşînê heqdarî yê kurdan.

Fermandarê Pêroyî yê QSDyî Mazlûm Ebdîyî bi mesajê vîdeoyî tewrê komxebate bi. Ebdîyî bale ante polîtîkaya înkarî ser û vat kurdî eşkenê ke ewro Rojhelatê Mîyanênî de estbîyayîşê xo bidê qebulkerdene û xarîta de cayê xo bîgêrê. Ebdîyî vîst vîrî ke kurdan bi fedakarîye û bedalanê girdan xeylêk destkewteyî fînayî dest û vat kurdî Vakur, Başûr, Rojhelat û Rojawan de semedê heqanê xo yê ke ameyî xespkerdene têkoşîn kenê.

Ebdîyî semedê pawitişê destkewteyan veng da û wina veng kerd şarê kurdî û hêzanê sîyasîyan û leşkerayan: “Gerek metodanê pawitişê destkewteyan aver berê. Vakur, Başûr, Rojawan û Rojhelat de destkewteyê ma yê muhîmî est ê. Gerek nê bêrê pawitene. Ma xoverdayîş û têkoşînê xo girdêr bikerê; hêzan û xîtabê xo bikerê yew; Ma helêke cuwa ver bêşertan û prosesî bierjnê.”

Mazlûm Ebdîyî peynî de vat QSD semedê çareserkerdişê meseleya kurdan û yewîye hazir o.