Fermadarîya Pêroyî ya Meclîsê Leşkerî yê Minbicî, Fermandarîya Pêroyî ya Ceyş Siwarî, Fermandarîya Pêroyî ya Meclîsê Leşkerî yê Babî û Fermandarîya Pêroyî ya Quwetanê Cebhet Ekradî pîya eşkerayîya hempare daye û vat eke vera şarî hêriş bibo ê do cepheyê têkoşînî hîra bikerê.

Bi tewrbîyayîşê fermandaranê Meclîsê Leşkerî yê Babî, Ceyş Siwan û QSDyî verê meclîsê Mibicî de eşkerayîye ameye dayene. Eşkerayîye hetê Fermandarê Pêroyî yê Meclîsê Minbicî Mihemed Mistefa (Ebu Adil) ra ameye wendene.

Eşkerayîye de nê ameyî vatene: ''Ma şer nêwezanê la eke vera şarê ma hêriş bêro kerdene hêzê ma do bibê adresê têkoşînî.  Hêrişê dewleta tirke yê vera Minbic, Til Rifet û Kobanê 23ê gulane ra nata dewam keno. Dewleta tirke kena ke herêmanê bînan ê Sûrîye îşxal bikero. Minbic seke çeteyanê DAÎŞî ra ame xelisnayene ra nata dewê ci tim yenê bombardumankerdene. Şar beno mexdûr, banî yenê rijnayene. Camî, mekteb û dezgehê bînî yenê rijnayene.

Tehdît û hêrişê dewleta tirke têkoşînê vera DAÎŞî ser o zî tesîr kenê. Herême îşxalkerdeyî açarîyayî merkezê çeteyanê DAÎŞî. Maher El Egal rojanê peyênan de Efrîn de ame kiştene. Reyna serçeteyê bînî yê DAÎŞî herêmanê ke binê îşxalê dewleta tirke de yê tîya ameyî kiştene. No mojnena ke dewleta tirke senî paştî dana çeteyan.

Hêzê Pawitişî yê Minbicî, artêşa Sûrîye sînor û cepheyanê şerîdî hêzê xo ca kerdî û no hêz do pa çekanê giranan sewqê cepheyê şerî bo. No bi koordînasyonê Rûsya ame kerdene.

Ma cehd kenê verê hêrişan bigêrê la eke hêriş bêro kerdene ma do bi hewayêkê qehremankî cewabê ci bidê. Ma serranê ravêrteyan de hêzê û amadekarîya xo ya leşkerî xurtêr kerdî. Nika hêzêkê ma yo xurt yê  pawitişî est o. Ma do cepheyê têkoşînî hîra bikerê verê hêrişanê dewleta tirke bigêrê. 

Seba ke paştî danê hêzanê ma ma heme şarê Mibicî, pêroyê şaran û erşîran rê spas kenê. Ma veng danê heme şaranê Rojawanî ke wa cayê şerwananê xo de vinderê. Ma veng danê heme partîyanê sîyasîyan ke wa menfeatê xo caverdê û berpirsîyarîya xo ya neteweyîye bîyarê ca.''