Cerganê DAÎŞî 20ê çeleyî de hêrişê Zîndanê Sînaa yê Hesekê kerdbi. Mudaxeleyê QSD û Hêzanê Asayîşê Zereyî ra dima verê felaketêkê pîlî ame girewtene.

ANHA îtîrafê sercergê DAÎŞî yo ke mesuldarê hêrişê Sînaa yo, weşanayî.

Goreyê îtîrafan sercerg Ebdûllah Îsmaîl Ehmed 2014 de qezaya Holê de tewrê DAÎŞî bîyo û xeylêk operasyonê terorî kerdê. Ebdûllah Îsmaîl Ehmed xeylêk wezîfeyan ra dima beno mesuldarê ketîbeya 'El-Betarî' yê bajarekê El Şefa yê Dêra Zorê. Dima ke Bahoz de DAÎŞ ame binvistene Ebdûllah Îsmaîl Ehmed zî Hesekê de ameyo wezîfedarkerdene.

Goreyê îtîrafanê Ehmedî înan rê ferman dîya ke cergê Zîndanê Hesekê do biremê û ê zî wa hetkarîya nê cergan bikerê û bi asayî cergan berê Serêkanîyê û Girê Sipî.

Ehmedî îtîraf kerd ke 'walîyê DAÎŞî yê Hesekê' kesê bi nameyê Ebdulezîzî ci rê vato ke tay cergî remayî taxa Xiwêranî la kontrolê QSDyî ra dima nêeşkayî xo biresnê înan.

Ebdullahî îtîraf kerd ke armancê înan no bi ke tay kesanê 'taybetan' biremnê, mîyanê şarê herême de tersî vila bikerê û Hesekê bi temamî feth bikerê, bikerê merkezê xîlafetî. Goreyê planê DAÎŞî fethê Hesekê ra dima newe ra DAÎŞ do bêro ronayene. Ebdullahî bale ante ser ke DAÎŞî seba nê planî pêro herêman ra hêz waşto.

'MÎTî ma rê çekî şawitî'

Ebdullahî îfade kerd ke seba ke QSDyî cade mudaxele kerd û serebût girewt binê kontrolî planê înan pûç bîyê û da zanayene ke MÎTî înan rê çekî şawitî.

Ebdullahî vat: ''Ma cebil, çek û mayînî amade kerdî. Warê operasyonî de kamerayî nayî ro. 3 koman no operasyon kerd. Her kome 2 kesan ra yena pê. Çek, mayîn û kamerayî teslîmê nê kesan bîyî. Koma yewine doo wesayîtê QSD û Îdareyê Xoserî hedef bikerdêne. Koma diyîne zî do Hesekê de wesayîtê leşkerî û noqtayê leşkerî hedef bikerdêne. Koma hîrêyîne zî do Şedadê de noqtayê leşkerî, wesayît û sivîlî hedef bikerdêne. Ebdulezîzî ferman da ke ma namdaranê Îdareyê Xoserî hedef bikerê.''

Ebdullah Ehmed 14ê nîsane de operasyonêkê QSDyî de tepişîya û serê ci de xeylêk çek, mayîn û cebilxaneyî est bîyî. Goreyê dokument û tehqîqatan Ebdullah Ehmed hetê MÎTî ra odaya operasyonî de dîyayêne xebitnayene ke Tirkîya ra yena îdarekerdene.

Dima ke no sercerg tepişîya xeylê planê terorî zî ameyî pûçkerdene.