Merkezê Rojawanî yê Cigêrayîşanê Stratejîkan (NRLS) qezaya Amûdê ya Qamişloyî de salona Beyselanî de komxebata mîyanneteweyîye ya derheqê çeteyanê DAÎŞ'î de viraşte. Dimayê qiseykerdiş û sînevîzyonî yê derheqê kerdişanê DAÎŞ'î şahidê ganeyî yê terorê DAÎŞ'î ameyî goşdarkerdene.

Waştişê şahidanê barbarîya DAÎŞ'î yo ke tewr zaf vejîya vernî, muhakemekerdişê çeteyan ê herêmanê Vakur û Rojkewtena Sûrîye bi.

Cinîya Êzidîye: Ma terorê DAÎŞ'î Xovîr ra Nêkenê 

Cinîya Êzidîye Makbûle Êzidîye ya ke Şengal ra bîye, kêfweşîya xo ya seba binkewtişê DAÎŞ'î ard ziwan û vat: "Heta ma weş bê, ma terorê DAÎŞ'î xovîr ra nêkenê. Verê çimanê dinya de qirkerdiş virazîya. Verê çimanê ma de qirkerdiş virazîya, domanî geste ver merdî. Çew persê nê qewimîyayîşan nêkenoç Înan rotî, tecawuz kerdî, kiştî û her tewir kerdişê teberê merdimîye bica ardî. Ez zî 4 serrî destê înan de esîr menda. Xusûsen zî Êzidîyî hedefê hêrişan bîyî. Înan ma eştî zîndanan, çimê ma girêdayî. Ma destê înan ra remayî û ameyî binê hukmê QSD'yî. Ma QSD'yî ra xeylî kêfweş ê, înan hemverê DAÎŞ'î de şerêko bêhempa kerd.”

Sûat Mirad Xelef Imra zî vat "Ma wextêk zindan de mendî û dima ra ameyî erdê Sûrîye. Bi hezaran doman û cinîyî destê DAÎŞ'î de merdî. Ez sayeyê QSD'yî de DAÎŞ'î ra xelesîyaya. Seba ke ez qesasê cinî û domananê Êzidîyan bigêrî ez tewrê YJŞ'yî bîya. Waştişê ma no yo ke DAÎŞ tîya bêro muhakemekerdene."

Sîbel Işike ya ke gazîya Qirkerdişê 20'ê Temmuze yê Pirsûsî ya zî vat ke "Bi nê qirkerdişan dewleta Tirkî ya îşxalkare waşt îradeyê şarî bişikno. Qirkerdiş de leşker û polîsanê dewleta Tirkî nêverda ke ma birîndaran berê nêweşxane. Nê qirkerdişî çi rey umîdê ma nêşikna. Heme dejê ma seypê yê. Embazê ma ye ke Pirsûs de şehîd kewtîbî vatêne wext wextê peşmîrîyayîşî yo, ganî şarê ma hendî bipeşmirîyo."