Hêrişanê dewleta tirke û cerganê înan de ke 9ê teşrîna verêne de vera Vakur û Rojhelatê Sûrîye dest pêkerd 300 hezarî ra zêder kesan koç kerd. Sivîlê koçberî dbistanan de Kampa Waşokanî yê Hesekê de ameyî cakerdene. Cinî-camêrd Ferîde-Ehmed û keyeyê înan zî nê keyeyan ra yew o ke zulmê dewlete tirke ra neçare mendî ke koç bikerê.

Keyeyî destpêkê hêrişanê DAÎŞî yê 2014î de Kobanê ra koçê bajarekê Ebû Raseynî yê Serêkanîyê-Til Temirî kerd. Dima ke Ebû Raseyn de hêrişêko pîl dest pêkerd koçê Til Temirî kerd. Na reye zî hêrişê dewleta tirke ra koçê Tolkoyî yê Hesekê kerd.

Ferîde vat: "Domanê ma kişenê, keyeyê ma rijnenê. Ma hêrişan de neçare mendî ke hîrê rey koç bikê. Hêrişî ra verî rewşa ma zaf başe bîye. Nika ma mîyanê zehmetîyan ê pîlan de yê. Erdogan û cergê ci herême de ca girewt. Kesêk zulmo ke dewleta tirke vera şarî kena nêvîneno. Ganî dewleta tirke û cergê ci herême ra bêrê vetene. Se beno wa bibo ma do abigêrê erdê xo."

Ehmed Îsmaîlî zî vat: "Bi top û hawanan hêrişê ma kenê. Ma destê dewleta tirke ra zaf zulm û zordarîye dîye. Ma tim koç kerd." Ehmed Îsmaîl wazeno ke artêşa tirke û cerga aye herême ra bêrê vetene û abigêrê cuya xo ya verêne.