Meclîsê Sûrîyeya Demokratîke (MSD) û Meclîsê Neteweyî yê Sûrîye Viyane de kombîyayîşê çapemenîye kerd û da pêhesnayene ke înan semedê ronayîşê koalîsyonê hemparî pê kerd. Serekê Meclîsê Neteweyî yê Sûrîye Dr. Emir Zêdan û Hemserekê MSDyî Riyad Derar zî tewrê kombîyayîşî bîyî.

Emir Zêdano ke kombîyayîş de qisey kerd vist vîrî ke Meclîsê Netweyî yê Sûrîye 5 serrî verê cu hetê grûbanê muxalîfan ra ame raameyene û sey têgerayîşêko sîyasî yo û vat: ''Meclîsê ma semedê caardişê waştişê şarî yê azadîye bîyaro ca bi hêzanê demokratîkan pêvînayîşan keno. Ma vera îdareyê dîktatorî semedê ronayîşê Sûrîyeya demokratîke têkoşîn kerd. Nika zî semedê têkoşînê hemparî ma bi MSDyî pêkerdişêk kerd.''

Riyad Derarî zî vat têkoşîno hempar do vernîya çareserîye abikero.

Meclîsê Neteweyî yê Sûrîye xo sey rêxistinê komelkî û sîyasîyî temsîlkarê heme şaranê ê Sûrîye vîneno û semedê çareserîya sîyasîye têkoşîn keno.