Bi serkêşîya Meclîsê Sûrîye yê Demokratîkî (MSD) komxebata dîyine ya seba ameyoxê Sûrîye Eyn Îsa de dest pêkerde.

Heme herêmanê Sûrîye ra xeylî partî û grûbanê muxalifan ra 100 delegeyî tewrê komxebate bîyî, xo dayîşnaskerdişî ra dima bi rêzgirewtişî komxebate dest pêkerde.

Komxebate bi qiseykerdişanê hemserekanê MSDyî Rîyad Derar û Emîne Omere dest pêkerde. Komxebate do di rojî dewam bikero û babetê sey “halê merdimayî yê Sûrîye, modelê îdareyê Sûrîye û halê îqtîsadî yê Sûrîye“ bêrê ercnayene, înan ser o munaqeşeyî bêrê kerdene. Komxebata ewilêne 19ê Temmuze de amîbî viraştene.   

RÛSYA, ÎRAN Û TIRKÎYE DO PÊ BIVÎNÊ

Hetêna ra dewletê Rûsya, Îran û Tirkîye zî paytextê Kazakistanî Astana de ewro bi rojdemê Sûrîye yenê têhet. Îdlib pêvînayîşo ke yeno plankerdene meşte bêro viraştene de rojdemo bingeyên o.