Temsîlkara Îdareyê Xoserî ya Rojawanî Nûrşane Hisên derheqê yewîyan kurdan de ANFyî reyde qisey kerd û hîşyar kerd ke eke yewîye nê prosesî de zî nêra caardene beno ke no firsendo tarîxî hînî nêvirazîyeno.''

Qiseykerdişê Nûşrane Hisên ra beşêk wina yo: ''Ganî destkewteyê kurdan bêrê pawitene. Kurdî hema zî rastê polîtîkaya qirkerdişî yenê. Her wextî ra zêdêr hewceyê ma pê yewîye esto. Hêzê îşxalkerî babeta kurdan de benê yew. Ganî ma vera naye vengê xo berz bikerê. Ma ewro îsbat kerd ke kurdî hînî kurdê verênî nîyê. Polîtîkaya 'parçe bikere û îdare bikere' nakokîya kurdan ser o awan bibî. Rojawanê Kurdîstanî de herêmî estê ke binê îşxalî de yê, demografîya herême yena vurnayene, sivîlî yenê qetilkerdene. Coka merdim eşkeno vajo ke eke yewîya kurdan nê prosesî de zî nêra caardene beno ke no firsendo tarîxî hînî nêvirazîyeno.

Caardişê yewîya kurdan erk û wezîfeyo verên ê her hêzêkê kurdan o. Eke partî yan zî têgêrayîşêk yewîya neteweyî asteng bikero ganî vera înan tewirêk bêro mojnayene. Îdareyê Xoserî Rojawan de zaf partîyê ke tede terefgîrê ci zî çin ê binê siwanêke de dayî arê. Seba îtîfaqî mabênê înan de dîyalogan do bêrê destpêkerdene. Verî wa îtîfaq bêro ronayene dima zî yewîye.

Pêşnîyazê Birêz Abdullah Ocalanî seba şarê kurdî manadar û girînd ê. Peymana 1982î de mabênê PDK û PKKyî de ameye îmzakerdene ke pê na peymane verê birakujî ame girewtene. Mektubê Ocalanî seba yewîya neteweyî zaf zelal bi. Mektub de venga PDK û YNK ame dayene ke no çîyêko tarîxî yo. 

Destpêkê awankerdişê Îdareyê Xoserî ra heta nika ma seba yewîye û paştdayîşî venga Herêma Kurdîstanî, partîyanê Başûrî danê. Înan ma rê zaf hetkarîye zî kerde. La ganî asta stratejîke de tewir bêro mojnayene. Ganî Hukmatê Herême ambargoyê vera Rojawanî bişikno. Ma eşkenê vajê ke hînî ronayîşê Kongreya Neteweyî ya Kurdîstanî wezîfe û berpirsîyarîyê ma yê pêroyînan o.''