Hemserekê Yewîya Êzidîyan a Efrînî Mustafa Neboyî cewab da persanê ANFyî.

Neboyî vist vîrî ke wextê Osmanîyan de kurdê êzidîyî 72 reyî maruzê fermanan bîyî û ronayîşê Komara Tirkîya ra dima zî fermanî dewam kerd. Neboyî pare kerd ke Şingal de qirkerdişê DAÎŞî de zî rolê Tirkîya estbi.

Neboyî vat: ''Gerîla û şerwanan ra nêbîyêne Şingal de qirkerdişêko pîlêr do biameyêne kerdene. Dewleta tirke kurdanê êzidîyan ê Şingalî ra dima hêrişê Efrînî kerd, verî êzidîyî kerdî hedef û bi nê vat 'Ma şima Şingal de nêqedînayî la do tîya de biqedînê.' Dewleta tirke û cerganê ci Efrîn de sey DAÎŞî êzidîyî qetil kerdî, cinîyî remnayî, cayê ma yê fîrazî talan kerdî. Çi êzidî çi misilman dewleta tirke wazena pêro kurdan qetil bikera.

Pêro dinya, Amerîka, Neteweyê Yewbîyayî û Ewropa Qirkerdişê Şingalî şinasnenê. La talan, qirkerdiş û zulmê dewleta tirke yê vera Rojawanî peygoş kenê. Na zî nakokîya înan eşkera kena. Rojawan de hetê nînan ra qirkerdişê êzidîyan sey meşrû yeno dîyene. No zî mojneno ke ê paştî danê îşxalê Efrînî. Reyna nê dewlet û rêxistinî têkoşînê Rojawanî yê vera DAÎŞî şinasnenê la Îdareyê Xoserî nêşinasnenê.''

Neboyî da zanayene ke Peymana Hewlêr-Bexdadî ya serê Şingalî seba êzidîyan yena manaya fermanê 73. Neboyî vat: ''Na peymane de rolê Tirkîya esta. Tarîxê peymane de 9ê teşrîna verêne de vera Rayber Apoyî komplo amebi kerdene û Serêkanîyê-Girê Sipî ameybî îşxalkerdene. Na peymane armanc kena ke êzidîyan bêpawitiş û bêhêz verda û zemînê qirkerdişêkê neweyî awan bikera. Îdareyo Xoser ê Şingalî, YBŞ, YJŞ, Asayîşê Êzidxanî nê pêro meşrû yê.

Dewleya tirka ha Başûrê Kurdîstanî de hêrişê gerîlayan kena la hukmatê Başûrê Kurdîstanî vera ney bêveng o heta nê hêrişan meşrû keno. Eke dewleta tirke Zap û Qendil de ser bikewa a do verê xo bida êzidîyan. Na peymane de Tirkîya reyde rolê PDK, Amerîka, NY û Iraqî zî estê. Nê dewlet û rêxistinî wazenê êzidîyî Şingalî ra vejîyê û şorê Ewropa. Eke ê raşta zî heqê êzidîyan pawenê wa îdare û hêzanê mi bişinasê.''

Neboyî ard ziwan ke sayê fikranê Rayberê Şarê Kurdî Abdullah Ocalanî de komelê êzidîyan heqê xo vistî destî û vat: ''Ewro vera gerîlayanê Kurdîstanî hêrişê giranî yenê kerdene. Dişmenê kurdan wazenê têkilîya Rayber Apoyî bi teberî bibirnê û PKK biqedînê. Ma do heta peynî Rayber Apo û hêzanê ci bipawê. Ma hêrişanê vera PKKyî qebul nêkenê. Ganî ma vera nê hêrişan vengê xo berz bikerê. Ganî êzidîyî hînî erdê xo war nêverdê û xo ver bidê.''