Safhaya hîrêyîne ya Operasyonê Merdimatîye û Asayîşî qedîyaye ke 27ê çeleyî de vera hucreyanê DAÎŞî Kamap Holî de dîyabi destpêkerdene. Operasyon de 85 cergî tepişîyayî, dest nîya xeylêk malzemeyan ser. Hêzanê ke operasyon de cagirewt, Kampa Holî de bi eşkerayîyêka çapemenîye agahîyî dayî.

Vervatoxa Merkezê Îrtîbatî û Çapemenîye yê YPJyî Rûkene Cemal eşkerayîye wende û vat: ''No operasyon netîceya îtîrafanê cerganê DAÎŞî yê tepişteyan de ame kerdene. Nê cergî firsendê hêrişanê dewleta tirke û rejîmê Sûrîye ra xo rêxistin kerd. Operasyonê ma goreyê planê ma qewimîya. Ma dest na xeylêk malzemeyan ser û çend tunelî eşkera kerdî. Ma dî ke DAÎŞî seba ke kampe bivisno binê kontrolê xo amadekarîyêka pîle kerda. 

Hetê bînî ra operasyon de berpirsîyarê cerganê Kampa Holî Ebu Sufyan Elhêbî ame kiştene. Ancî operasyon de cinîya êzidîye Îdoye Xorto hetê hêzanê ma yê YPJyî ra destê cergan ra ameye xelisnayene.

Heyf ke kampe de hema zî ferasetê DAÎŞî domanan jehrîn kena. Na safhaya operasyonî de zî hêzanê ma erkê xo bi hesasîyetî ardî ca. La hetê bînî ra rêxistin û dezgehê mîyanneteweyîyan paştî nêdanê ma. Têkoşînê vera DAÎŞî teyna milê Îdareyê Xoserî û hêzanê ma yê leşkerî û asayîşî de mend.

Safhaya hîrêyîne ya Operasyonê Merdimatîye û Asayîşî qedîyaye la heta ke DAÎŞî ra rêçêk zî nêmano têkoşîn û xebatê ma do dewam bikerê. Eke hewce bikero ma operasyonanê hîrayan zî bikerê.''

Eşkerayîye de bîlançoya operasyonî wina ameye rêzkerdene:

''Cergê ke tepişîyayî: 85 

Çekê ke dest nîyayo ser: 8 kalaşnîkofî, 4 mayînî, 2 teqaberî, 7 bombayê destan, 25 çekî, 1 guleyê Bisfingî û xeylêk malzemeyî.

Teçhîzatê leşkerîyî

Madeyê narkotîkî

5 tunelî ameyî îmhakerdene.''