Şerwanê enternasyonalîstî yê Yewînanê Pawitişê Şarî (YPG) Serhat Tiqqunî ANFyî reyde qisey kerd. Tiqquno ke mîyanê têgêrayîşê xoserî yê Nantes Revoltee de wextêkê dergî kar kerd 3 serrî yo ke Rojawan de tewrê YPG bi û vera DAÎŞî şer keno.

 Tiqqunî vat: "Ez tewrê YPGyî bîya û verê cû zî têgêrayîşê şorişgêrî yê tirkan de mi têkoşîn kerd. Mi Rojawan de dî ke şarê Rojawanî seba ke şorişê xo temam bikero kewt mîyanê têkoşînêkê pîlî. Paştdayîşê YPG-YPJyî yê vera îşxalê dewleta tirkî seba Ewropa, Amerîkaya Vakure û pêro dinya wezîfeyêkê birûmetî yê merdimîye yo.YPG û YPJ hêzê şorişgêr ê ke sozê ameyoxî danê. Mabênê komelanê sosyalîstan, femînîstan de projeyê konfederalîzmê demokratîkî hewn û xeyal nîyo. Seba ke herême de haştîye û aramî estbê çareserîyêka tewr girînge konfederalîzmo demokratîk o.

Hêrişê hewayî yê dewleta tirke de embazê ma û yewînanê ma ra 8 embazî şehîd bîyî. Fermandara ma û embaza ma Cerene Guneş şehîd bîye. Caardişê xeyalanê şehîdan têna pê dewamkerdişê têkoşînê înan beno. Wexto ke ma embazê xo fikirîyenê ganî ma têkoşînê înan biresnê asta tewr berze û xurt bikê.

Mîyanê cergan de ke hêrişê ma kenê cergê ''Îslamîstî'' yê cîyayî estê. Ganî no baş bêro famkerdene. Vera rêxistinbîyayîşê Rojawanî hêriş kenê. Aya ke nê cergan kom kena û rêxistin kena Tirkîya bi xo ya. Mabênê koma cergan MSO ya Tirkîya de bi seyan kesî estê ke verê cû tewrê DAÎŞî bibî. Nê kesî herême de qirkerdiş kenê, dizdî kenê û sucê merdimîye kenê. Ganî hetê leşkerî û sîyasî ra nê faşîstî bêrê çinkerdene.

Tirkîya çekan û firsendanê NATOyî pêşkêşê nê cergan kena. Merdimê Ewropa ganî têbigêrê ke nê polîtîkayê dewlete xo asteng bikerê. Dewletanê serdestan nika zî bire daye ke Rojawan têna biverdê. Na rewşe şermêk a. Şarê dinya pêro ganî seba Rojawanî game bierzê."