Fermandarê Tabûra Azadîye ya Enternasyonalîstan Torlak Pîl Kemalî ard ziwan ke Rojawanî de çinkerdişê îşxalkeran do seba pêro şaran bibo mîsalêk û vat: "Têkoşînê vera hêrişanê faşistan wezîfeyê ma yo û ê pêro dinya yo."
Tabûra Azadîye ya Enternasyonalîstan seba paştdayîşê têkoşînê şaranê Rojawanî û Vakur û Rojhelatê Sûrîye yê vera DAÎŞî Serêkanîyê de 12ê hezîrana 2015î de awan bi. Bi hawayêkê çalakîyî tewrê têkoşînî bi. Wexto ke dewleta tirke 9ê teşrîna verêna 2019î de dest pê îşxalê vera Girê Sipî û Serêkanîyê kerd Tabûra Azadîye ya Enternasyonalîstan zî tewrê xoverdayîşê vera îşxalan bi. Fermandarê tabûre Torlak Pîr Kemalîzî ANFyî rê behsê têkoşînê xo kerd.
Kemalî vat: "Şorîşê Rojawanî Rojhelatê Mîyanênî de bi hêvîyêka pîle. Şorişê Rojawanî yo ke mîyanê rejîmanê kanperestan û otorîteran ê herême de awan bi seba pêro dinya bi hêvî. Bi Şorişê Rojawanî cinîyî her cayê cuye de bîyî hêzê eşkerakerde. Cepheyanê şerî ra heta rêxistinkerdişê komelî cinîyî bi hawayêkê çalakîyî û bitesîrî tewrê her cayê cuye bîyî. Coka Şorişê Rojawanî enerjîya azadîya cinîye û şorişgêrîya cinîye tewrê cuye kerdî. Şerwanê enternasyonalîstî yê Tirkîya û yê welatanê bînan tewrê nê xoverdayîşî bîyî û tim paştî daye şarê Vakur û Rojhelatê Sûrîye. Ma QSDyî reyde vera Erdoganî û DAÎŞî şer kerd. Ma tewrbîyayîşê nê şerî sey wezîfeyêkê xo yê şorişgêrîya enternasyonalîstî vînenê.
Çinkerdişê îşxalkeran û serkewtişê hêzanê şaran bi nê hawayî xizmetê şarî bikê. Îşxalkeran nika ra bi se hezaran merdimî warê înan ra kerdî. Ganî nê merdimî abigêrê warê xo labelê seba naye zî ganî îşxalkerî bêrê erşawitene. Tîya de wezîfe keweno milê pêro bindestan. Naye ra paştdayîşê enternasyonalîstan girîng o. Têkoşînê vera hêrişanê faşîstan û cergan wezîfeyê ma û ê şaranê dinya yo."
