Berê sînorî yê Sêmalka yê mabênê Rojawan û Başûrê Kurdîstanî de 2013 ra nata tim meseleyî estê. Berê sînorî de pê îtîfaqê MÎT-PDKyî tay gamê bînî yenê eştene. Nê gamî dima ke dewleta tirke vera herême gefî werdî ameyî eştene.

Berê Sêmalka yo ke seba Rojawanî bero girewte yo, sînorê Başûr-Rojawanê Kurdîstanî de yo. No bero ke berê bazirganîye yo zî û tira derman, malzemeyê tibî zî derbaz benê. Nêweşê rojawanijî zî seba tedawî nê berî ra derbaz benê.

Merdimê ke karê înan Berê Sînorî yê Sêmalka de qedîyenê dokumentanê xo danê Îdareyê Pêşxabûrî û hînî cewab pawenê. Cewabî ra dima merdimî şinê selahîyetdaran ra forman gênê. Dima şinê odayêke û oda de nînan rê persî persîyenê. Eke merdimî cewab nêdê nê persan selahîyetdarî pê heqaret kenê û gef wanenê. Goreyê nê texmînan kesê ke nê persan persenê îstîxbaratê tirkan (MÎT) ra yê.

Form de persê cîya-cîyayî estê. Hemwelatîyî vanê ke ê pê nê têgêrayîşî qayîl nîyê la neçare yê ke berî ra derbaz bibê. Hemwelatîyan vat: ''Ma zî kurd ê, ê zî kurd ê. La çîyo ke ê anê ma ser aqlê ma nêgêno.''

Berê sînorî de bi taybetî cinî û ciwanî maruzê kerdişanê xiraban manenê. Ciwanêko rojawanij semedo ke vato 'heval' maruzê derbe mendo. Reyna berê sînorî de wezîfedarî nêverdenê ke şerwanê birîndarî yê QSD, YPG û YPJyî  derbaz bibê û şorê tedawî bibê. 

Cara Berê Sînorî yê Til Koçerî girewte yo eke Berê Sêmalka zî bêro girewtene rojawanijî do xeylêk zehmetan biancê. Îdareyê Xoserî nê têgêrayîşan ra dima hezîrana vîyarte de waşt ke Berê Sêmalka biqefilno la ame vatene ke 'Ê wazenê berê Rojawanî Başûrî rê biqefilnê.' Îdareyo Xoser zî vano ê nêwazenê şarê înan maruzê nê têgêrayîşî bimano.

Îdareyê Sêmalka yê Îdareyê Xoserî derheqê qefilnayîşê berê sînorî de wina vatbi:

1-Raywanan rê yeno mecburkerdene ke formê agahîyan ê îstîxbaratî debikerê. Merdimê nêweşî û êyê ke hê zewijîyenê 48 saetan yenê vindarnayene. 

2-Raywanî bi seatan verê berê sînorî de yenê vindarnayene. Îfadeyê înan yeno girewtene.

3-Birîndarê ke seba tedawî şinê Başûrî nêzdîbîyayîşê veramerdimîye înan rê yeno kerdene. Prosesanê cipêrsayîşî yê îxtîxbaratî ra derbaz benê.

4-Destûr nêdîyeno ke kesê ke derheqê xo de form nêdanê berî ra cade derbaz bibê.