Rayber Apoyî bi wesîleya Roşanê Qurbanan Îmrali de birazîyê xo û Wekîlê DEM Partî Omer Ocalan, lajê waya xo Alî Ocalanî û di domanê Alî Ocalanî dîbî.

Wekîl Omer Ocalanî derheqê pêvînayîşî de Ajansê Mezopotamya (MA) rê qisey kerd. Omer Ocalanî derheqê pêvînayîşî de nê agahîyî dayî:

‘’Serek Apoyî 15-20 deqanê verênan de qalê dewe û keyeyî kerd, selamî şawitî. Dima qalê xebatanê xo û serweşîyanê seba Riza Altun û Alî Haydar Kaytanî kerd. Serekî keyeyê Kaytan û Altunî û Mazlûm Doganî pers kerdî, selam şawit. Serekî keyeyê Ferhat Kurtayî pers kerd, dima qalê çar embazanê xo Ferhat Kurtay, Eşref Anyik, Mahmut Zengîn û Necmî Onerî kerd ke Zîndanê Amedî de bedenê xo dabi adirî ver. Ey qalê tayê serebûtanê dewa Xursî ya Qoserî kerd.

Ma ey rê selamê ê merdimanê ke 30 serran ra dima zîndanî ra vera dîyayê kerd. Rayber Apoyî zî vat ke ganî nê merdimî teber de zî serkêşîya komelî bikerê û ê selam kerdî. Serekî keyeyê şehîdan zî selam kerdî.

Ma ey rê qalê Zanîngehê Kobanê kerd. Rayber Apoyî pers kerd ke çend wendekarê zanîngehî est ê. Rayber Apoyî vat ke ganî zanîngeh de goreyê modernîteya demokratîke dersî bidîyê, tesîrê kapîtalîzmî tede çin bo, paradîgmaya ci wa wendekaran de bêra parekerdene. Ey vat ‘Ez zaf girîngîye dana perwerdeyî. Ma tim tîya de wanenê û nîqaş kenê.’ 

Ma ey rê vat ke mabênê QSD û hukmatê Şamî (HTŞ) de peymana bi 8 madeyan ameya îmzakerdene. Rayber Apoyî zî vat ‘Ganî dîyalogê mabênê Şam û kurdan bizêdîyê. Seba ma girîng o ke Sûrîyeyêka bihêze vejîya werte. Ganî Sûrîyeya demokratîke bêra caardene. Şam hema îslamîperestîye keno. Ganî binê sîwana demokrasîyî de yewîye biba. Ganî xebatê Rojawanî bêrê lezkerdene. Ganî kurdê Rojawanî vera gefan baldar bibê.’

Ma qalê rewşa DEM Partî kerd. Serekî vat ‘Ganî DEM Partî her ca de konferans û kombîyayîşan bikero û nînan de kesê ke paradîgmaya ma hol zanenê qisey bikerê. Ganî fikrê şarî bêrê girewtene. Ganî Dengizê Reşî de DEM Partî rayanê xo bizêdîna. Ganî Anatolîya de DEM Partî potansîyelê xo bimojna ra. Tirkîya de krîz û xizanîye est ê. DEM Partî ganî vera nînan bixebita, her ca de hêzê xo bizêdîna. Ganî her ca de yew newebîyayîş est bo. Mîyanê DEM Partî de embazê ma yê ke Dengizê Reşî ra yê est ê. Ganî nê kesî Dengizê Reşî de xebatan bikerê. DEM Partî eke rayanê xo bikera se ra 20 do biba îqtîdar û Rojhelatê Mîyanênî sîyasetêkê bitesîrî bikera.’

Serek pêvînayîş de bimoral bibi. Mi ey rê qalê raporo ke ey şawito Kongreya PKKyî kerdo. Mi vat ke elewîyî qerqilîyenê û tayê rexneyê înan est ê. Serekî vat ‘Ma tîya de seba elewîyan xebitîyenê. Tîya de embazê ma yê elewîyî zî est ê. Embaz Hamîlî Yildirim elewîtîya Dêrsimî hol zaneno. Mi tim qîmet da tewir û têkoşînê Seyîd Rizayî. La ganî ma bi cesaretî û raştî serebûtan û netîceyanê înan biercnê. No seba Şêx Seîdî zî wina yo. Xora ma rexneyanê raştan qebul kenê.’

Ma qalê êzidîyan zî kerd. Serekî êzidîyan rê selamê xo şawit. Serekî vat ke ganî Şingal azad bibo, pabesteyê partîyêke yan zî hukmatêkî nêbo, wayîrê statuyî bibo, êzidîyî wa xo rêxistin bikerê û îdareyê xo bikerê.

Tornê xala mi zî ameybî pêvînayîşî. Serekî nînan rê vat ke ‘Payan ser de û biîrade bê.’ Serekî rewş û perwerdeyê domanan pers kerd, seba domanan analîz kerd û vat ‘Wa her kes bi dîsîplîn bibo, miqatê weşîya xo bo, kîlo nêgêro. Wa her kes senî ke leşkerî mîyanê artêşe de têgêrenê têbigêrê.’ Ma nê pêvînayîşî de reya verêne Omer Hayrî Konar û Hamîlî Yildirim zî dîyî. Mi nînan rê xeberê teberî dayî. Ê zî sey Serekî bimoral bîyî. Ê zî qewimîyayîşanê teberî nêzdî ra teqîb kenê.’’

Omer Ocalanî pare kerd ke ganî dewlete verê waştişanê şarî de cade game bierza.

Omer Ocalanî bale ante pêkewtişanê mabênê Îran û Îsraîlî ser û vist vîrî ke Rayber Apoyî zî na babete de verê cû hişyar kerdibi. Omer Ocalanî vat: ‘’Wextê pêvînayîşî de pêkewtişê mabênê Îran û Îsraîlî hendê nêbîyî. 6 mengî verî pêvînayîş de Serekî qalê Sûrîye, Îran û Iraqî kerdibi û ey vatibi ‘Rojhelatê Mîyanênî de nika yew Gazze est o. Eke verê şerî nêro girewtene 50 Gazzeyî do bivejîyê werte.’ Seke Serekî vato dîyalog yeno manaya demokrasîyî. Ganî dewletî hinî xo bivurnê. Kurdî zî ganî yewîya xo bîyarê ca, xopawitişî xurtêr bikerê.’’