Hemserekanê DEM Partî Tulaye Hatîmogullari û Tuncer Bakirhanî temsîlkaranê Partîya Kede (EMEP) reyde Meclîs de pêvînayîş kerd. Pêvînayîş de vengdayîşê ‘Haştîye û Komelê Demokratîkî’ yê Rayber Apoyî ame ercnayene.

Dima derheqê pêvînayîşî de eşkerayîye dîyaye.

Serekê EMEPî Seyît Aslanî pêvînayîş de vat: ‘’No proses seba çareserîya meseleya kurdan zaf girîng o. Serkewtişê nê prosesî do bi şaran bido qezençkerdene. Partîya ma seba ke şer û pêkewtişî biqedê heta peynî do destek bida nê prosesî. 

Nê prosesî de ganî her kes erk û mesuldarîyanê xo bîyaro ca. Ganî tecrîdê Îmraliyî bero wedaritene û îqtîdar seba averşîyayîşê prosesî gamanê zelalan bierzo.’’

Tuncer Bakirhanî zî dîyar kerd ke Rayber Apoyî seba ke meseleya kurdan bi muzakere û dîyalogan bêra çareserkerdene no vengdayîş kerdo û vat: ‘’Bi beşdarîya pêro partîyan û dezgehan no proses do ser bikewo. No metn seba pêro şaranê Tirkîya yo.’’

Heyetê DEM Partî ewro CHPyî zî do zîyaret bikero.