Têgêrayîş û rêxistinanê cinîyan ê Rojawanî programê xo yê 8ê Adare Roja Cinîyan ê Kedkaran  a Dinya eşkera kerd.

Cinîyan Merkezê Huner û Kulturî yê Mihemed Şêxoyî yê Qamişloyî û Bexçeyê Şehîde Hevrîne Xelef yê Reqa de derheqê programê xo de bi slogana ''Ma do pîya şorişê xo bipawê û herra xo azade bikerê'' di eşkerayîye cîyayî dayî.

Eşkerayîyan de wina ame vatene: ''Rixmê heme têkoşînê ke bi serran o yeno domnayene cinîyî raştê hêrişê camêrd-dewlete yenê. Seba ke îradeyê cinîyan bêro şiknayene bitaybetî Rojhilatê Mîyanênî de cayê ke hetê rejîmanê zulmkaran, dewleta tirke û rêxistinanê radîkalan ra ameyî îşxalkerdene de îşkence yeno kerdene. Cinîyan Rojawan de bi hêzê xo zaf çî bedilna û ronayîşê Îdareyê Xoserî de rol girewt. Semedê pawitişê destkewteyan cinîyî rêçê têkoşînê YPJ, şehîdî Sosine Bîrhat, Awaze Urmiyê, Nûjiyane, Rojîn, Viyane, Îvana Hoffmane Kerîma Loran, Hevrîne Xelef, Hinde, Seîda, Zîlane Ereb û Wîdade Yûnan de têkoşînê xo domnenê.''

Eşkerayîyan de semedê tewrbîyayîşê çalakîyan û aktîvîteyan ame vengdayene û programê çalakîyan ê ke mabanê 23ê sibate û 10ê adare de do bêrê kerdene  ame eşkerakerdene. Goreyê naye 1ê adare de gorê şehîdan do bêrê zîyaretkerdene û eşkerayîye bêro dayene. Derheqê Roja Cinîyan a Dinya de do semînerî bêrê dayene û medyaya sanale ser o panelê komelkî bêrê kerdene. 10ê adare de do seranserê Rojawanî de şayîyî bêrê kerdene. Têgêrayîş û rêxistinê cinîyan do goreyê programanê xo aktîvîteyanê cîya cîyayan bikerê.