Qezaya Amûdê ya Qamişloyî de bi tewrbîyayîşê welatanê cîyayan ê dinya derheqê ‚DAÎŞ’î de forûm ame destpêkerdene. Forûm hetê Merkezê Cigêrayîşanê Stratejîkan ê Rojawanî (NRLS) ra ame organîzekerdene. Xeylî welatanê dinya ra, xeylî rojnameger, akademîsyen, sîyasetmedar û cigêrayoxî tewrê forûmî bîyî.

Sîno: Waştişê Ma Stratejîya Seba Asayîşî ya

Endamê NRLS’yî Ehmed Sînoyî vat ke „Seba ke sûcê çeteyanê DAÎŞ’î yê ke hemverê Kurdan de kerdê, ma vejê werte, ma waşt ke heme şarê Sûrîye tewrê nê forûmî bibê. Amacê nê forûmî bewlîkerdişê stratejîya seba asayîşê herême û pêşnîyarîyê seba mucadeleyê hemverê DAÎŞ’î yê. Seba ke endamê DAÎŞ’î goreyê peyman û huqûqê mîyanneteweyîyî bêrê muhakemekerdene û seba gamê pratîkî yê rayapêroyîye û ya mîyanneteweyîye bêrê bewlîkerdene no forûm îmkanêko pîl o.“

Dimayê qiseykerdişan ra derheqê terorê DAÎŞ’î de sînevîzyonêk ame ramotene. Forûm bi qiseykerdişanê şahid û mexdûranê barbarîya DAÎŞ’î dewam keno.