Merkezê Çapemenîya QSD'yî bîlançoya 17'ê Teşrîna Verêne ya roja 9'ine ya  hêrişanê îşxalî yê dewleta Tirkî eşkera kerde.

Eşkerayîye wina ya:

"Hêrişanê artêşa Tirkî ya îşxalkare bi hewayêkê bêserûberî xeta sînorî de dewam kerd. Hêrişî bi top, tank, û çekanê giranan û hêrişanê teyarayan ê şerî reyde pêroyê herême de nêvindert. Reyna sey cewabî, çarçeweya pawitiş o meşrû de şervananê QSD'yî cewabî dayî pêroyê hêrişan.

Dêrik

Artêşa îşxalkare şan dewanê  Dêrikî bi çêtinî bombardûman kerde. Bombardûman de zerarêko pîl resa keye û milkanê sivîlan. Şervananê ma zî dewanê Qesir Dîb, Heyaka, Wadî el-Zîab û Şebaniyê de cewab da hêrişan û kampa artêşa îşxalkarîye ro da. Netîce de 3 leşkerê îşxalkaran ameyî kiştene leşkerêk zî birîndar bîyo.

Amûdê

Xeta Elûkî de dimayê şerêko giran artêşa îşxalkare pêroyê çeteyê xo herême ra tepîya antî. Dewa Xereze de zî û herêmanê bînan ê sînorî de zî, netîceyê bombardûmana artêşa îşxalkare de embazêkê ma birîndar bîyo û zerarêko madî resa sivîlan. Hêzanê ma zî cewab da hêrişan.

Serêkanîyê

Şaristan de binê bombardûmananê çêtinan ê top û baran û teyarayanê şerî de komanê çeteyan waşt ke debikewê taxan. Taxanê Newroz, Mehata, Zorava û Zerdeştî de şerêko giran mabênê hêzanê ma û komanê çeteyan de qewimîyo. Netîce de hêriş ame şiknayene. Nê taxan de bi temamî 70 çeteyî ameyî kiştene. Bi hêrişanê topî, tangî, drone û teyaran zî îşxalkare nêeşka dekewe nêweşxaneyê şaristanî. Dimayê xoverdayîşê şervananê ma yê dormeyê nêweşxaneyî de hêriş ame şiknayene û tewr tay 10 çeteyî ameyî kiştene. Hêzanê ma nê hêrişanê giranan de zî nêverda çeteyî debikewê şaristanî. Bînayê pîlî yê şaristanî bîyî hedefê drone û teyarayanê şerî. Xetanê Menacîr û Alya de şerêko giran qewimîyo. Tîya de zî bombardûmana çêtine de sivîlî birîndar bîyî.

Girê Sipî

Hêrişan de, hêzanê ma dewanê Ebû Sira û rojawanê Girê Sipî de çalakîyî viraştî û nê çalakîyan de hûmarayêka komanê çeteyan ameye kiştene. Panzer û wesayîtanê leşkerî derbî werde û ameyî îmhakerdene. Dewanê Xirbet Yûsif, Wabdê û Tirwazîyê de hêrişê hewayî û bombardûmanî ameyî kerdene. Nê hêrişan de kampanê hêzan ê Sûrîye zî hedef bîyî. Hêzanê ma cewab da hêrişan û nê dewan de zî wesayîtê leşkerîyê ke panzerêk zî tede yo, ameyî îmhakerdene. Nê herêman de artêşa îşxalkare bi şaşîye da çeteyanê xo ro û netîce de hûmarayêke ra zêdêr çeteyî ameyî kiştene.

Pêroyê netîceyê şer û xoverdayîşî de tewr tay 93 çeteyê artêşa îşxalkare ameyî kiştene, hûmarayêke ra zêdêr çeteyî birîndar bîyî û 4 wesayîtê zirxî, 4 seyreyê leşkerî, tangêk ameyî îmha kerdene.

Şer de 9 embazê ma şehîd bîyî, 41 embazê ma zî birîndar bîyî.

Netîceyê ke cor de ameyî dayene, prosesê verê qerarê vindertişî yê şerî yê ke Fermandarîya Hêzanê Sûrîye ya Demokratîke zî paymanbendê ci ya.  Labelê artêşa îşxalkare û komanê çeteyan reyna zî hêrişanê xo yê verba Serêkanîyê rê dewam kerd."