Dewleta tirke ya îşxalkere 17ê hezîrane de bi droneyanê çekdaran qezaya Kelarî ya Silêmanî ya Başûrê Kurdîstanî de da wesayîtêkî ro. Netîceya hêrişî de Hetkarê Hemserekanê Konseya Rayberdişî ya Îdareyê Xoserî yê Rojawanî Ferhat Şiblî û hîrê embazê ci yê têkoşînî şehîd bîbî.  

Fermandarîya Pêroyî ya Hêzanê Sûrîyeya Demokratîk (QSD) derheqê Şiblî û embazanê ci eşkerayîye daye û nê vatî: ''Dewleta tirke semedê vergirewtişê têkoşînê xelisnayîşê herre û şarê ma hêrişanê terorî kena. Hedefgirewtişê Ferhad Şiblî tersanekîya dewleta tirke mojnena.

Ma cengewar Ferhadî pê têkoşînê ci yê girdî yê Rojawanî sarisnenê. Cengewarêko hêzdar bi. Semedê dewaya şarê xo xebatê xo bêteredut ardêne ca. Şexsê ko mutewazî, zervêşaye û durust bi. Pêro cuya xo şertenê zehmetan de semedê ronayîşê cuyeya newî xerc kerd.  Ronayîşê Îdareyê Xoserî de rolo pîl kay kerd. Mîyanê şaranê herême de ruhê cuya hempare aferna. Semedê caardişê projeyan sîyasî û komelkîyî rolo esasî kay kerd. Wextê şerê dergî de bi leteyêkê destkewteyanê şehîdanê ma.

Hêrişê vera Şehîd Ferhadî sûcanê dewelta tirke ya îşxalkere moneno. Reyna têkoşînê ma yê meşrûyî zî fîneno çiman ver. Hêrişê vera qehremananê ma nêeşkenê verê têkoşîn hêzan û şarê ma bîgêro. Ma do semedê wayîrvejîyayîşê ercanê şehîdan têkoşînî xurtêr bikerê.

Hêzê ma yê ke barê pawitişê şar û herra xo kirişenê  do îşxalkeran ra qesasê nê hêrişan bigêrê û heta leşkerê peyênî herra xo ra vejî têkoşînî xurtêr bikerê.  Na çarçewe de ma keyeyanê şehîdan û şarê xo rê serweşîye wazenê û hêvî kenê ke keda şehîdanê ma bibo wesîleya hemleyêka newîye û xurtkerdişê rêxistinbîyayîşî.''