Hêzanê Sûrîyeya Demokratîke (QSD) derheqê hêrişê çeteyanê dewleta tirke ya îşxalkere de eşkerayîya nuştekîye daye û nê pare kerdî:

"Bêşik nê hêrişî bi destê dewleta tirke yenê kerdene û yeno waştene ke herra Sûrîye bêra îşxalkerdene. Bitaybetî herême Îdareyê Xoserî hedefê nê hêrişan de yê. Waştişê înan o ke yewîya şaran bixeripnê. Nêwazenê şarê kurd, ereb û şarê bînî pîya mîyanê haştîye biciwîyê. Nê semedî ra vera herêmanê Îdareyê Xoserî hêrişanê giranan kenê.

Vera şarê Heleb û Şehba planêko xurt yê qirkerdişî fînayo dewre. Na rewşe bitaybetî semed herêmanê Îdareyê Xoserî semedê heme şaramê Sûrîye tehdîto gird o. Têna warê ke binê kontrolê QSDyî yê hedefê înan de nîyê, dewleta tirke kena ke heme Sûrîye îşxal bikero û şaranê herême ra qesas bigîro.

Çend rojî yo hem cepheyê Minbicî de hem zî cephaneyanê rojawanê Firatî de şervanê ma vera nê hêrişan xoverdayîşê girdî danê û têkoşînê biheybetî rayra benê. QSD pîya bi heme pabesteyanê  senî ke heta ewro kerd, ewro ra tepîya zî çîyo ke destê ci ra yeno keno. Bedelê ci çi beno wa bibo ma do berpirsîyarîya xo ya tarîxî bîyarê ca û vera hêrişan vinderê. Bêşik herême û şarê Sûrîye do bêrê pawitene.

La no şer, şerêko tarîxî yo. Ganî şarê ma yê herême mîyanê nê şerî de bi hewayêkê aktîfî ca bigîro. Ganî bi ruhê seferberîyê şar bi  hêzanê asayîş û pawitişî pîya têbigêro. Ma nê rojanê tarîxîyan de şarê xo ra wazenê ke wa dewan û bajaranê xo de çarçewaya şerê şarê şorişgêrî de cepheyanê têkoşînî de ca bigîro.

Ma veng danê ciwananê kurd, ereb, suryanî, asûrî, ermenî, tirkmen û çerkesî ke wa wezîfeyê xo yê tarîxîyî bîyarê ci û tewrê refanê QSD, YPJ, YPGyî bibê. No şerê merdimîye û anorî yo. Têkoşînê pawitişê azadî û erjanê merdimîye yê şaran o. Vera tarîtîya DAÎŞ û Erdoganî şerê roşnayî û serkewtişî yo. Ma do pêro pîya vera nê hêrişan xover bidê û ser bikewê.''