Çapamenîya Merkezê Hêzanê Sûrîyeya Demokratîke (QSD) bîlançoya 24 satenê peyênan ê eşkera kerde:

"Artêşa Tirkî ya îşxalkare tarîxê 21'ê Teşrîna Verêne de reyna adirbirnayîş binpay kerd û zafê herêman de bi teyarayanê bêmerdimî hêriş kerd serê çeperanê QSD'yî.

Serêkanîyê

Artêşa îşxalkare dewanê Ebû Rasen, Morêks, Mişrefa û Menacirî de xîret kerd ke hêriş bike serê çeperanê ma. Komanê çeteyan bi wesayîtanê zirxî û çekanê giranan hêrişê nê dewan kerd. Hêzanê ma çarçeweya pawitişo meşrû de cewab da hêrişanê înan, netîce de hûmarêka çeteyan ameye kiştene û panzerêkê înan ame îmhakerdene. Çeteyê ke waştenê hêrişê bendanê kontrolî yê nêzdîya Til Temirî bikê, rastê cewabdayîşê hêzanê ma ameyî.

Amûde 

Komê çeteyanê ke waştêne sînor derbas bikê û herême newe ra îşxal bikê, rastê cewabê hêzanê ma ameyî. Cewabdayîşê şervananê ma de tewr tay 15 çeteyî ameyî kiştene û panzerêk ame îmhakerdene. Artêşa îşxalkare serê rayîrê Til Temirî de bi teyarayanê bêmerdimî hêriş kerd. Netîceyê hêrişî de embazêk şehîd kewto û 3 embazê ma zî birîndar bîyî. Reyna artêşa îşxalkare rojawanê şaristanê Dirbesîyê de bi teyarayanê bêmerdimî hêriş kerd çeperanê ma û hemwelatijanê sivîlan. Nê hêrişan de embazêkê ma şehîd kewto û zîyanê madîyî resayî keyeyanê dewijan. Hêzanê ma çarçeweya pawitişo meşrû de cewab da nê hêrişan.

Eyn Îsa 

Komanê çeteyî waşt ke bi hetkarîya wesayîtanê zirxî û çekanê giranan hêriş bikê serê dewanê Mişrafa û Berberîyê. Hêzanê ma cewab da nê hêrişan û hûmarayêka çeteyan ameye kiştene. Heman herême de netîceyê hêrişê hewayî de 2 embazê ma şehîd bîyî.

Hêrişanê artêşa îşxalkare û netîceyê cewabdayîşê hêzanê ma de tewr tay 15 çeteyî ameyî kiştene, 2 panzerî ameyî îmhakerdene. Xoverdayîş de 7 embazanê ma bi mêrxasîye şer kerd û şehîd kewtî, 10 embazê ma zî birîndar
bîyî."