Merkezê Îrtîbat û Çapemenî yê QSD'yî derheqê hêrişanê îşxalkaran û xoverdayîşê verba înan de eşkerayîye daye. Eşkerayîye de nê çîyî ameyî parbekerdene:

"Roja hîrêyîn a xoverdayîşê tarîxîyî de, artêşa Tirkî ya îşxalkare û çeteyê ci Vakurê Sûrîye û Rojawanî de hêrişê şarê ma kenê. Rewşa xoverdayîşê tarîxîyî bi nê hewa ya:

Girê Spî

Mabênê Silûk û Girê Spî de pêkewtişê  zaf giranî qewimîyenê û dişmen pêroyê teknîkê xo serê herême de dano xebitnayene û dewanê bi nameyê Til Findir û Yapse de şer dewam keno. Netîceyê şerî de 11 çeteyî ameyî kiştene. Di embazê ma şehîd bîyî û 5 embazê ma birîndar bîyî.

 Serêkanîyê

Roja hîrêyîne ya xoverdayîşê tarîxîyî de şervanê ma Serêkanîyê de şerê giranî seba şiknayîşê dormegirewtişî xoverdayîşî pîl kenê. Netîceyê pêkewtişanê çêtinan ê herême de nêzdîya 94 çeteyî ameyî kiştene û 80 birîndarê înan bîyî. Dewanê Til Xelef, Elezîziyê, Til Erqem, Xirbet Benat, Til Xenzîr, Diwêra de şer û  pêkewtişî dewam kenê. Nê pêkewtişan de 20 şervanê ma şehîd bîyî û 24 şervanê ma zî birîndar bîyî. Heman wextî de wesayîtê zirxinî yê tîpê BMB'yî yê dişmenî ame îmhakerdene û çeteyê ke zereyê ci de bîyî, ameyê kiştene.

 Kobanê

Netîceyê hêrişê sekvanî yê şervananê ma de leşkerêk ame kiştene. Artêşa Tirkî ya îşxalkare dewa Elî Şarî rê bombardûman kerde. Cewabdayîşê şervananê ma de leşkerêk ame kiştene û qereqolê dişmenî ame îmhakerdene.

 Amûde

Wextê nêmroje de şaristanê Dirbêsîyê û Amûde ameyî bombardûmankerdene. Netîceyê de embazêk ma şehîd bîyo û di endamê cepheyê xopawitişî birîndar bîyî. Serê cewabdayîşê şervananê ma de qerekolê sînorî ame vêşnayene û aracê zirxî tîpê BMB'yî ame îmhakerdene.

 Qamişlo

Hêrişê dişmenî yê serê sînorê şaristanî dewam kenê û bi cewabdayîşê şervanan no hêriş ame şikîyayene. Heman wextî de dewa Sêgira de aracêkê dişmenî ame vêşnayene. Netîceyê hêrişî yê teyaraya keşfî yê serê sînorî hemwelatijê ma yê sivîlî şehîd bîyî û birîndar bîyî. Hetê bîn de hêrişanê topvaranê hawanan de 6 şervanî û zafê sivîlî birîndar bîyî.Merkezê şaristanê Qamişlo de hetê werdegehê Omerî hêrişêkê xokiştişî bi wesayîtan ame kerdene, netîce de şehîd û birîndarî estê û zafê zîyanê madîyî zî bîyî. No hêriş hetê çeteyanê DAÎŞ'î ra ame kerdene.

 Dêrik

Artêşa Tirkî Dêrik de waşt sînor derbas bike, netîceyê nê de  şer û pêkewtişî dewa Qesir Dîbî de qewimîyayê û 6 leşkerî ameyî kiştene û 23 birîndar bîyî. Dewamê şero çêtin de dewa Delavê Kera de aracêkê leşkerî ame îmxakerdene û dimayê nê zî dewe daye verê topan.

Mabênê şervananê ma yê dewa Carudîyê  û leşkeranê artêşa Tirkî ya îşxalkare yê qereqolê dewa Babîla yê Cizîra Botanî de şerêk qewimîyo.Vizêr dewa Banûkîyê de qereqolê dişmenî bîyo armancê şervananê ma û netîce de qereqol ame vêşnayene, 6 leşkerî ameyî kiştene û 21 leşkerî birîndar bîyî. Şan de dewa Dêrika Beravî de şervanan nuqteyêkê dişmenî û aracêkê dişmenî vêşna.

Şerê roja 11'ê Teşrîna Verêne de artêşa Tirkî ya îşxalkare pêroyê sînorî pêroyê hêzê xo yê teknîkî, teyarayanê keşfî, teyarayanê şerî û topvaranê obusî, hawanan û tengan xeta sînorî û şaristanî bi giranîye hedef kerd û da piro.Netîceyê nê de xoverdayîşê şervananê ma pîl bîyo û 118 çeteyê dewleta Tirkî ameyî kiştene û 90 çeteyî zî birîndar bîyî.Nêzdîya 23 şervanê ma şehîd bîyî û 37 zî birîndar bîyî."