Merkezê Çapemenîye yê QSDyî derheqê çalakîyanê ke 24 saatenê peyênan de vera dewleta tirke û çeteyanê SMOyî de ameyî kerdene, eşkerayîye daye û nê vatî:

''Çarçewaya çalakîyanê meşrûyan ê ke vera hêrişanê dewleta tirke ya îşxalkere û çeteyanê ci yenê kerdene de YPJyî vizêr (Îne) Qilê Qereqozaxî de vera baregehê neweyî yê artêşa tirke çalakîya bitesîre kerde. Çalakîye de tanqêk û radarêkê artêşa tirke ameyî îmhakerdene.

Vera eynî baregehî hetê Yewîyanê Şehîd Harunî ra çalakîye ameye kerdene. Netîceya na çalakîye de tanqêk ame îmhakerdene. Reyna dormeyê qilî de panzarêk û wesayîto leşkerî yo bi tîpê Toyota zî ameyî îmhakerdene.

Cepheyê başûrê Minbicî de û vakurê Awbendê Tişrînî de hêzanê ma vera dewleta tirke û çeteyanê ci 5 nuqtayan de çalakîye kerde û wesayîtêko leşkerî yê çeteyan îmha kerd.

Cepheyê Dêr Hafirî de zî Yewîyanê Şehîd Harunî vera nuqtaya ke hetê çeteyanê dewleta tirke ra sey baregeyê droneyanê çekdaran yeno şuxulnayene çalakîye kerde  û nuqtaya ke qala ci yena kerdene ameye îmhakerdene.

Nê operasyonan de 10 ra zafêr leşerê tirkan û çeteyî ameyî kiştene, xeylê îşxalkerî birîndar bîyî. Reyna xeylê tanq, wesayîtê leşkerî û baregehê leşkerî ameyî îmhakerdene

Vizêr teyarayanê şerî yê dewleta tirke dewê Xeseq, Melhe û Bîr Hisoyî Kobanê dayî bombayan ver. Îşxalkeran reyna dewê Girê Sêvê, Cadê, Bîr Hiso, Tîne, Melhe û Dîkanî pê obus û tanqan dayî bombayan ver. Netîceya hêrişan de ziraro madî ame meydan.

Hetê bînî ra dewleta tirke pê teyarayanê şerî, droneyanê çekdaran û tanqan dormeyê Awbendê Tişrînî û başûr û rojhelatê Minbicî da bombayan ver. Netîceya hêrişan de xesaro madî yo pîl ame meydan.''