Berpirsîyarê Têkilîyê Pêroyî yê QSD'yî Xelîlî derheqê hêrişanê qirkerdişî yê artêşa Tirkî ya îşxalkare û çeteyanê aye serê Vakur û Rojakewtena Sûrîye de kombîyayîşê çapemenîye viraşt.

Rêdûr Xelîlî vat: "Ma pêro wezîfeyê xo yê seba cihanî kerdî û pêro peymanê mîyanneteweyî ardî ca, la eşkerayîyê ke hetê komelanê mîyanneteweyîyan ra yenê kerdene, hêrişê dewleta Tirkî nêvindernenê. Ma ewro hemverê di cepheyan de yê, o yewin hêrişê Tirkîya yo, o diyîn zî hêrişê çeteyanê DAÎŞ'î yo."

Rêdûrî wina dewam kerd: "Îşxalkarîya Tirkî sivîlan kişena, no suc o. Ma do pawitişê şarê xo rê dewam bikê." Xelîlî ard ziwan ke 200 ra zêdêr qurbanî şehîd û birîndar bîyî, 45 şervanê înan zî şehîd bîyî. Rêdûr Xelîlî parbe kerd ke ê tewirê Yewîya Ewropa rê sipas kenê û seba têkoşînê ci dewletanê Ereban rê sipas kenê.

Rêdûr Xelîlî wina dewam kerd: "Heta nika gamêka pratîke hetê Koalîsyona Mîyanneteweyî ra seba wedaritişê hêrişî nêameye eştene. Ewro dewleta Tirkî xîret kena ke pêroyê Vakur û Rojakewtena Sûrîye îşxal bika. Hetê bînî ra zî, bi hezaran endamê DAÎŞ'î zîndananê ma de estê, heta nika ma eşkayê rewşe kontrol bikê, la eke rewşe bêra vurnaeyene wezîfeyê ma yo verêne do pawitişê şarê ma bibo."