Mabênê îdarekaranê Hêzanê Sûrîyeya Demokratîke (QSD) û Temsîlkara Taybete ya Şerê bi Çekî û Domanan a Sekreterîya Pêroyîye ya Netewyê Yewbîyayeyî (NY) Vîrgînîa Gamba de seba qedexekerdişê domanan ê mîyanê şerê herême pêvînayîşî ameyî kerdene. Bi tesdîqkerdişê QSD’yî û Îdareyê Xoserî yê Vakur û Rojakewtena Sûrîye, NY’yî dir 29’ê Hezîrane de peymanêka plane hemparî awanîya dîyine ya tewr pîle ya NY’yî ya Palaîs des Natîions a Cenevre de amî îmzakerdene.

Merasîmê îmzakerdişî yo ke Ofîsa Cenevre ya NY’yî de ame viraştene de, temsîlkara taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba, fermandarê QSD’yî yo pêroyî Mezlûm Ebdî, fermandara YPJ’yî ya pêroyîye Newroz Ehmede û hemserekê Meclîsê Rayberdişî yê Îdareyê Xoserî yê Vakur û Rojakewtena Sûrîye Ebid Ham el-Mîhbaş amade bîyî.

Temsîlkara taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba eşkerayîyêk daye û QSD’yî zî bi îmzakerdişê peymane tesdîq kerd ke do bi tu hawayî rayîr nêro dayene ke domanî zereyê şerî de ca bigêrê û domanan çekdar bikerê. Eşkerayîye de bale amî antene ke bi îmzakerdişê peymane eke mîyanê hêzanê înan de kesê ke emrê înan binê 18’î de yo estbê do bêrê vetene û ancî vernîya çekdarkerdişê domanan û mîyanê şerî de şuxulnayîşê înan bêro girewtene.

Temsîlkara Taybete: Rojêka Muhîm a

Temsîlkara Taybete ya Şerê bi Çekî û Domanan a Sekreterîya Pêroyîye ya Neteweyê Yewbîyayeyî (NY) Vîrgînîa Gamba ard ziwan ke îmzakerdişê QSD’yî ya na peymana qedexekerdişê çekdarkerdişê domanan û hemverê nê de vetişê înan muhîm o û vat: “Ewro Sûrîye de seba pawitişê domanan rojêka muhîme yena ciwîyayene, heman wextî de destpêkê merheleyêka newî amî tesdîqkerdene ke do QSD rayîr nêdo ke binê sîwanê xo de tu domanêk bêro çekdarkerdene û zereyê operasyonan de bêro wezîfedarkerdene.”

Eşkerayîye de ame bi vîr vistene ke îmzakerdişê na peymane netîceyê kombîyayîşanê dûr û dergan ê mabênê îdarekaranê NY’yî û QSD’yî de bica ameyo.

Temsîlkara taybete ya NY’yî Gamba vat ke peymana derheqê qedexekerdişê domanan ê çekdarkerdişî seba vurayîşê tewirê hetanê şerî, vernîgirewtişê binpaykerdişanê giranan ê hemverê domanan û hetê rindkerdişê halê domanan ra xeylî muhîm a.

Gamba veng da heme hêzanê ke zereyê raporê şerwananê domanan ê Sekreterîya Pêroyîye ya NY’yî de yê, seba bêçekkerdişê domanan gamanê laziman bierzê.

Îdarekaranê QSD’yî spasîyê xo pêşkêşê NY’yî kerdî, ard ziwan ke Îdareyo Xoser meseleyê polîtîkayanê domanan de hetê îdarekaranê NY’yî de yo.