Efrîn heta dewleta tirke û cerganê aye ra ame îşxalkerdene. Dewleta tirke 20ê çeleyê 2018î de dest pê hêrişê Efrînî kerd û 18ê adare de şaristan îşxal kerd. Destpêkerdişê îşxalî ra nata sucê şerî yenê kerdene. Her roje keyeyê sivîlî yenê  xespkerdene, sivîlî seba fîdyeyan yenê remnayene, îşkence bi sivîlan yeno kerdene yan zî sivîlî yenê kiştene. Şarê Efrînî yo ke herêma Şehba de yo ma rê qala dejê xo yê serê rayîrê koçberîye kerde.

Dayîka Fatime Murad Mihemed a ke dewa Kîmare ya qezaya Şêrawa ya Efrînî ra ya wina vat: "Ma dewa Kîmare ra vejîyayî û ma verê xo da dewa Mezinî. Ma keyeyê xo de runiştbî ke nişka ra vengê guleyan ame. Ma binê daran de mendî çend rojan. Dima ma cayêk dî û tede mendî. Dima dewleta tirke hêrişê ucayî zî kerd û ma bi payan keyeyî ra vejîyayî. Ne domanî ne zî kalî eşkayêne rayîrî ra şorê.  Ma resayî dewa Zehara. Kesêkî ma berdî keyeyê xo ca da ma. Dima ma derbazê dewa Ehdesî bîyî."

Dayîka Erîfe Hisên a ke dewa Qêsimî ra ya wina vat: "Dewa ma nêzdîya sînorî de ya. Wexto ke dewleta tirke hêrişê dewa ma kerde ma şîyî qezaya Meydankê û dima hêrişê uca zî kerde. Ez bi di domananê xo Efrînî ra vejîyaya. Bi payan ma resayî dewa Basûtê û reyna teyarayanê şerî ma ser o bombayî varnayî. Binê nê bombardûmanî de wesayîtêkî ma resnayî dewa Meyasê. Domanê min ê bînî û camêrdê mi 4 rojan ra dima Efrînî ra vejîyayî. Camêrdê kênaya min a pîle Cindirêsê de hetê teyrayanê şerî ra bombardûmanêk de birîndar bî. Tewr peynî de ma ameyî dewa Babinisî de ca da xo."