Goreyê Banê Çimdarîye yê Heqanê Merdiman ê Sûrîye şewa Yewşemeyî fuzeyê Rûsî vera dronanê çeteyan ameyî şuxulnayene. Ame zanayene ke dronî herêma Lazkîye ya ke cîranê Îdlîbî ya de baregehê eskerî yê Rûsî yê Hmeimîmî ser ra fir dayî.

Herêma Îdlîbî û dormeyê ci de çeteyê ke pabesteyê Tirkîya yê  estî. Reyna Hama, Haleb û Lazkîye de grûbê çeteyan estî. Rejîmê Sûrîye û îtîfaqê ci Rusya nêzdîyê hîrê mengan o ke nê herêman bombardûman kenê.  Goreyê çimdaran hêzê rejîmî bi çeteyanê Heyet Tahrîr El Şamî yê ke pabesteyê El Kaîde yê û çeteyanê bînan kewtê pêkewtişan.  Bajarekê El Habîtî yê Îdlîbî de  roja Yewşeme kewt binê kontrolê rejîmî. Çimdaran bale ant eke operasyono ke peynîya Nîsane de ame destpêkerdene de reya verên a ke bajarekêk kewt destê rejîmî. Hêzê rejîmî ver bi bajarekê Han Şehnûnî yo ke cayêko stratejîk o aver şino.  Goreyê zanayîşan pêkewtişanê roja Yewşemeyî de tewr tay 61 kesî merdî. Nînan ra 21 endamê hêzanê rejîmî yê, 40 zî çeteyî. Roja Şeme 70 şerwanî pêkewtişan de merdîbî.

Yeno îdîakerdene ke peynîya menga Nîsanî ra nata netîceya şîdetê herêma Îdlîbî de 810 ra zafêr sivîlî, 1.200 çeteyî û tewr tay 1.000 endamê rejîmî merdî.